Як паведамляе «Голас Амэрыкі», паводле вэрсіі сьледзтва, мужчыны плянавалі зьдзейсьніць напады паблізу сталіцы Францыі на наступным тыдні.
Кіраўнік пракуратуры Франсуа Малін паведаміў прадстаўнікам прэсы, што група падазраваных мужчын атрымлівала інструкцыі ад камандзіра «Ісламскай дзяржавы», які знаходзіцца ў сырыйска-ірацкім рэгіёне.
Па словах Маліна, мужчыны мелі намер зьдзейсьніць атакі ў прыгарадзе Парыжа ў наступны чацьвер, аднак галоўная мэта тэракту пакуль застаецца нявысьветленай. Малін адзначыў, што ўлады выявілі скрыншоты мапаў Google зь некалькімі вылучанымі месцамі. Паводле паведамленьняў, сярод мэтаў, якія разглядалі тэрарысты, былі паліцэйскія ўчасткі, штаб-кватэра службы ўнутранай выведкі ў Парыжы і парк «Дыснэйлэнд» у прыгарадзе сталіцы.
Кіраўнік пракуратуры Парыжа паведаміў, што чацьвёра падазраваных зьяўляюцца грамадзянамі Францыі і іх арыштавалі на ўсходзе краіны, у Страсбургу, у мінулыя выходныя. У групоўку таксама ўваходзіў адзін грамадзянін Марока, які пражываў у Марсэлі. У некаторых з падазраваных не было гісторыі парушэньняў, выяўленых паліцыяй. Францускія ўлады таксама выявілі дакумэнты, у якіх падазраваныя кляліся ў вернасьці «Ісламскай дзяржаве» і ў якіх усхваляўся лёс сьмяротніка.
Па выніках ператрусаў улады выявілі агнястрэльную зброю і іншыя матэрыялы, уключаючы інструкцыі аб тым, дзе знайсьці і набыць зброю.
