Сёлетні ляўрэат Нобэлеўскай прэміі ў галіне літаратуры, амэрыканскі паэт і сьпявак Боб Дылан не паедзе ў Швэцыю, каб асабіста атрымаць прэмію.
Швэдзкая акадэмія, якая прысуджае прэмію, паведаміла, што атрымала «асабісты ліст», дзе тлумачыцца, што Дылан ня зможа прыехаць на цырымонію ў наступным месяцы «праз папярэднія абавязаньні». Паведамляецца, што ў лісьце 75-гадовы Дылан кажа пра «вялікі гонар» у сувязі з узнагародай і выказвае шкадаваньне, што ня здолее атрымаць яе асабіста.
Як паведамляе Бі-бі-сі, Дылан будзе ня першым ляўрэатам за апошнія гады, хто не прыехаў на цырымонію. Раней тое ж адбылося з ляўрэатамі 2005 і 2007 году — Гаральдам Пінтэрам і Дорыс Лэсінг.
«Прэмія ўсё адно належыць ім, гэтак жа як Бобу Дылану, — гаворыцца ў заяве акадэміі. — Мы чакаем Нобэлеўскую лекцыю Боба Дылана, якую ён мае правесьці — гэта адзінае патрабаваньне — цягам шасьці месяцаў, пачынаючы ад 10 сьнежня 2016 году».
У інтэрвію брытанскай газэце The Telegraph у кастрычніку Дылан паведамляў пра намер прысутнічаць на цырымоніі ўручэньня прэміі ў Стакгольме 10 сьнежня. «Я высока цаню аказаны мне гонар», — сказаў Дылан тады.
