Пра гэта сьведчаць дадзеныя экзытполаў, якія публікуе агенцтва Reuters. Папярэднія вынікі галасаваньня чакаюцца 14 лістапада.
Паводле апытаньняў грамадзкай думкі Радэў набраў крыху больш за 59 адсоткаў галасоў. 53-гадовы Радэў заклікае да адмены санкцый супраць Расеі і выступае супраць міграцыйнай палітыкі Эўразьвязу. Яго апанэнт — сьпікер парлямэнта Цэцка Цачэва, якая прадстаўляе кіруючую партыю «Грамадзяне за эўрапейскае разьвіцьцё Баўгарыі».
Другі тур прэзыдэнцкіх выбараў прайшоў у Баўгарыі ў нядзелю. У першым туры Радэў набраў 25,5 працэнтаў галасоў, за Цачэву прагаласавалі 22 адсоткі выбарнікаў. Абраны прэзыдэнт уступіць у пасаду 1 студзеня 2017 года. Тэрмін прэзыдэнцкіх паўнамоцтваў у Баўгарыі складае пяць гадоў.
Генэрал Румэн Радэў займаў пасаду вайскавода ВПС Баўгарыі. У пачатку жніўня ён падаў у адстаўку ў сувязі зь нязгодай з плянамі міністэрства абароны краіны дасягнуць пагадненьня з Польшчай аб сумеснай ахове баўгарскай паветранай прасторы.
