Лінкі ўнівэрсальнага доступу

Ад мора да мора: уздоўж беларускай мяжы хочуць пабудаваць аўтастраду зь Літвы да Грэцыі


Праца над праектам міжнароднай аўтастрады ад Клайпеды да Салонікаў пераходзіць у практычную фазу.

Пра гэта сёньня заявіла прэмʼер-міністар Польшчы Бэата Шыдла на прэс-канфэрэнцыі з нагоды 10-годзьдзя прыняцьця «Ланьцуцкай дэклярацыі».

У 2006 годзе міністры транспарту Польшчы, Літвы, Славаччыны і Вугоршчыны падпісалі дэклярацыю аб будаўніцтве найкарацейшай аўтадарогі на восі Поўнач-Поўдзень Эўропы. Праз чатыры гады да гэтай ініцыятывы далучыліся Баўгарыя, Румынія і Грэцыя.

Via Carpatia будзе праходзіць ад Клайпеды праз Коўна ў Літве, праз Беласток і Люблін у Польшчы, славацкія Кошыцэ далей праз Вугоршчыну, Румынію, Баўгарыю і Грэцыю.

Беларусь ў праекце Via Carpatia ня ўдзельнічае, але яе адрэзак ад літоўскай мяжы да Любліна на польскім баку будзе праходзіць у непасрэдным суседзтве беларускай мяжы. Даехаць ад памежных пераходаў з Польшчай да аўтабану, які вядзе ў Грэцыю, беларусам зойме менш за гадзіну, а на некаторых адрэзках — да паўгадзіны.

Прыйшоў час, калі мы рэальна пачынаем рэалізацыю інвэстыцыі Via Carpatia, стратэгічнай дарогі для Цэнтральна-Ўсходняй Эўропы — сказала Бэата Шыдла ў Ланьцуце на поўдні Польшчы.

Напрыканцы кастрычніка больш за паўтысячы дэпутатаў Эўрапейскага парлямэнту прынялі справаздачу прысьвечаную разьвіцьцю транспартнай інфраструктуры ў Цэнтральна-Ўсходняй Эўропе. У гэтым дакумэнце ёсьць заклік да Эўракамісіі і краін-сябраў ЭЗ распачаць неабходныя крокі для рэалізацыі фінансавага боку інвэстыцыі Via Carpathia.

Глядзець камэнтары (2)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG