У Малдове праходзяць першыя прэзыдэнцкія выбары за апошнія 20 гадоў. Выбары разглядаюцца як барацьба паміж тымі, хто падтрымлівае інтэграцыю з Эўрапейскім Зьвязам, і тымі, хто хоча шчыльнейшых сувязяў з Расеяй.
Паводле апытаньняў грамадзкай думкі, у прэзыдэнцкай кампаніі наперадзе сацыяліст Ігар Дадон. Але мяркуецца, што ён не набярэ даволі галасоў, каб перамагчы ў першым туры.
Дадон, 41-гадовы эканаміст, хоча павярнуць назад рух краіны да эўрапейскай інтэграцыі, якая ўключала б пагадненьне аб асацыяцыі, падпісанае ў 2014 годзе, нягледзячы на жорсткі супраціў з боку Масквы.
Мая Санду, былая міністарка адукацыі і кіраўніца Партыі дзеяньняў і салідарнасьці, лічыцца вядучым прэтэндэнтам ад прыхільнікаў інтэграцыі з Эўропай. Яна хоча пабудаваць будучыню Малдовы на аснове пагадненьня аб асацыяцыі Кішынёву з Брусэлем, якое прадугледжвае рэформы, патрабаваныя Эўразьвязам для ўмацаваньня шанцаў на сяброўства ў гэтай арганізацыі.
28 кастрычніка адзін зь вядучых дзеячаў царквы краіны, мітрапаліт Малдоўскай праваслаўнай царквы Ўладзімір, публічна падтрымаў Дадона ў пропаведзі. Упершыню царква ўзяла ўдзел у палітыцы на такім узроўні.
Хоць малдаване ў пераважнай большасьці праваслаўныя хрысьціяне, Малдоўская праваслаўная царква канкуруе за ўплыў у краіне з Румынскай праваслаўнай царквой, і гэтае суперніцтва адлюстроўвае моўны, этнічны і культурны падзел у Малдове.
Расея таксама разьмяшчае тысячы вайскоўцаў, дысьлякаваных у расейскамоўным Прыднястроўі, што адкалолася пасьля кароткай вайны, у выніку якой загінулі каля 1000 чалавек. Расея па-ранейшаму трымае войскі ў Прыднястроўі, называючы іх міратворцамі.
