На тры дні менскі Палац дзяцей і моладзі пераўтварыўся ў пляцоўку з робатамі і 3D-прынтэрамі. ВНУ ды прыватныя адукацыйныя цэнтры змаглі паказаць свае дасягненьні. Таксама былі госьці з Кіева.
Дзеці апантана канструявалі маленькіх робатаў з канструктару Lego, сачылі за рухам робата-картографа.
Каля 3D-прынтэраў зьбіраліся натоўпы цікаўных. Сучасная тэхніка можа надрукаваць што заўгодна: і бутэльку «Coca-Cola», і запчасткі да аўтамабілю. Па часе працэс зойме некалькі гадзінаў, хуткасьць друку залежыць ад аб’ёму працы. Кошт такога цуда-прынтэра — ад 2 да 4 тысяч даляраў. Таньней каштуе беларускі прынтэр — 850 даляраў.
Пры Палацы дзяцей і моладзі існуе гурток, у якім вучаць працаваць з праграмным забесьпячэньнем і друкаваць на 3D-прынтэры.
На фэстывалі былі прадугледжаныя спаборніцтвы сярод дзяцей на лепшае запраграмаваньне робатаў. Самаму маленькаму ўдзельніку — 7 год. Для выкладчыкаў праводзілася адукацыйная праграма.
Марына Яўсейчык для Радыё Свабода, фатаздымкі аўтара
