Міністар замежных справаў Нямеччыны Франк-Вальтэр Штайнмаер заклікаў Турэччыну як мага хутчэй адмяніць рэжым надзвычайнага становішча. Міністар выказаў занепакоенасьць вялікай працягласьцю экстранага рэжыму.
Штайнмаер таксама заклікаў турэцкія ўлады прытрымлівацца «прынцыпу вяршэнства закону» і выконваць правы чалавека ў дачыненьні да абвінавачаных у падрыхтоўцы бунту.
20 ліпеня прэзыдэнт Турэччыны Рэджэп Эрдаган абвясьціў аб увядзеньні надзвычайнага становішча ў краіне на тры месяцы. Уведзеныя меры дазволяць прэзыдэнту прымаць новыя законы ў абыход парлямэнту. Праваабаронцы асьцерагаюцца, што гэта прывядзе да рэпрэсій у адрас прыхільнікаў няўдалага бунту.
У ноч на 16 ліпеня ў Турэччыне адбылася спроба вайсковага перавароту, улады падавілі путч. Па падазрэньні ў дачыненьні да путчу былі затрыманы каля 6 тысяч чалавек, у тым ліку высокапастаўленых афіцэраў, чыноўнікаў і судзьдзяў. У школах і ВНУ звальняюць супрацоўнікаў, якія падазраюцца ў сувязях з прыхільнікамі бунту. У адстаўку былі адпраўленыя каля 1500 дэканаў турэцкіх унівэрсытэтаў. Былі адкліканыя ліцэнзіі ў больш за 20 тысяч выкладчыкаў прыватных школаў.
Самае папулярнае
1