Дональд Трамп абраў у якасьці кандыдата на пасаду віцэ-прэзыдэнта ад Рэспубліканскай партыі губэрнатара штата Індыяна Майкла Пэнса. Пра гэта паведаміў у твітэры сам амэрыканскі мільярдэр.
Пэнс ў пэрыяд з 2001 па 2013 год быў членам Палаты прадстаўнікоў Кангрэсу ЗША. Раней паведамлялася, што менавіта ён зьяўляецца найбольш верагодным кандыдатам на пасаду віцэ-прэзыдэнта.
Па выніках першасных выбараў Трамп набраў неабходную колькасьць дэлегатаў, неабходных для вылучэньня ў прэзыдэнты ЗША на зьезьдзе Рэспубліканскай партыі. Ён таксама застаўся адзіным рэспубліканцам, які ўдзельнічае ў гонцы, калі ўсе ягоныя супернікі па партыі выйшлі з барацьбы за Белы дом.
Зьезд Рэспубліканскай партыі, на якім Трампа назавуць афіцыйным кандыдатам, адбудзецца ў Кліўлэндзе 18-21 ліпеня.