Лінкі ўнівэрсальнага доступу

#Геніюш2016. Стартавала кампанія за рэабілітацыю Ларысы Геніюш


Ларыса Геніюш
Ларыса Геніюш

Моладзь БНФ распачала кампанію за рэабілітацыю беларускай паэткі і грамадзкай дзяячкі Ларысы Геніюш.

Кампанія пачалася 5 ліпеня і на раніцу 11-га было сабрана ўжо каля 200 подпісаў за поўную рэабілітацыю беларускай паэткі.

Як паведамляецца на старонцы кампаніі «Укантакце», свой подпіс на гэты момант можна паставіць на пікетах у Менску, на офісе Партыі БНФ, у Гомелі, Берасьці, Воршы і Магілёве. Усе навіны кампаніі будуць публікавацца пад хэштэгам #Геніюш2016.

«Ідэя зьявілася даўно, але распачаць кампанію падумалі цяпер, карыстаючыся пэрыядам перадвыбарчай кампаніі, і тым што зараз мы маем магчымасьць ладзіць пікеты, і адпаведна да большай колькасьці людзей данесьці інфармацыю і сабраць подпісы», — расказвае патэнцыйны кандыдат у дэпутаты Палаты прадстаўнікоў, адна зь лідэраў Моладзі БНФ Кацярына Шуст.

Паводле яе слоў, кожны дзень сама менш два пікеты з удзелам актывістаў Моладзі БНФ зьбіраюць подпісы за рэабілітацыю Ларысы Геніюш.

«За той час калі я знаходзілася ў пікеце было некалькі чалавек, якія падыходзілі, запытвалі і ня ведалі, хто такая Ларыса Геніюш. Але большасьць людзей, якія падышлі, якія зацікавіліся, яны сапраўды паставілі подпісы. Але ўсёй карціны я цяпер ня ведаю, бо і безь мяне ладзіліся пікеты іншымі маладымі людзьмі», — кажа актывістка.

Акрамя збору подпісаў за рэабілітацыю, актывісты Моладзі БНФ зьбіраюцца праводзіць і іншыя мерапрыемствы.

Ларыса Геніюш
Ларыса Геніюш

«Мы будзем займацца папулярызацыяй творчасьці Ларысы Геніюш, будзем зьвяртацца да Міністэрства адукацыі з тым, каб творчасьць Ларысы Геніюш была ўключана ў школьную праграму. Будзем праводзіць урачыстыя мерапрыемствы — вечарыны памяці, літаратурныя чытаньні і г.д.», — распавядае Кацярына Шуст.

Моладзь БНФ таксама будзе дамагацца стварэньня помніка Ларысе Геніюш і перайменаваньня адной з вуліц у яе гонар.

Кацярына Шуст падкрэсьлівае, што гэтая кампанія важная ня толькі таму, што трэба ўшанаваць памяць Ларысы Геніюш, але і таму, што гэта будзе спрыяць нацыянальна-культурнаму адраджэньню.

«Я ўпэўнена, што існуе вялікая колькасьць людзей, якія проста ня ведаюць усіх гістарычных момантаў і ўсёй важнасьці творчасьці Ларысы Геніюш, таму важна ў тым ліку і да іх усё гэта данесьці. На жаль, наша дзяржава не надае належнай увагі ня толькі памяці Ларысы Геніюш, але і шмат якім выбітным дзеячам. Таму над гэтым павінны працаваць мы, бо гэта заўжды будзе спрыяць умацаваньню салідарнасьці ў нашым грамадзтве і спрыяць нацыянальна-культурнаму адраджэньню», — кажа актывістка.

Ларыса Геніюш (1910-1983) — беларуская паэтка, пісьменьніца, дзяячка нацыянальнага руху. Была арыштаваная 5 сакавіка 1948 году органамі МДБ у Чэхаславаччыне, з кастрычніка 1948 году знаходзілася ў турме ў Менску. 7 лютага 1949 году Ларысу Геніюш асуджаюць на 25 гадоў зьняволеньня паводле артыкулаў Крымінальнага кодэксу БССР нумар 66 i 76, прынятых яшчэ ў 1926 годзе. Фармулёўкі гэтых артыкулаў: «контррэвалюцыйная арганізацыйная дзейнасьць» i «дапамога міжнароднай буржуазіі ў ажыцьцяўленьні варожай дзейнасьці».

У 1956 годзе тэрмін пакараньня зьмяншаюць да 8 гадоў, і яе вызваляюць. Пасьля вызваленьня доўгі час творчасьць паэткі была пад забаронай. Толькі ў 1967 годзе быў выдадзены першы ў Беларусі зборнік твораў Ларысы Геніюш.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG