Тэрэза Мэй ў сераду ўвечары стане прэм’ер-міністрам Вялікабрытаніі. Як паведамляе Бі-бі-сі, цяперашні прэм’ер Дэйвід Кэмэран у сераду пасьля поўдня ўручыць каралеве Лізавеце II афіцыйнае прашэньне аб адстаўцы.
Апошняе пасяджэньне брытанскага ўраду пад старшынствам Кэмерана адбудзецца ў аўторак.
Раней сёньня было абвешчана, што міністар энэргетыкі Вялікабрытаніі Андрэа Лэдсам выйшла з барацьбы за пасаду прэм’ер-міністра краіны. Такім чынам, яе суперніца Тэрэза Мэй засталася адзіным прэтэндэнтам на пасаду кіраўніка ўраду.
Тэрэзу Мэй яшчэ трэба будзе зацьвердзіць на пасадзе лідэра кансэрватараў і прэм’ер-міністра, але ў партыі маюць намер вырашыць гэтае пытаньне паскоранымі тэмпамі, перадае The Independent.
Тэрэза Мэй займае пасаду міністра ўнутраных спраў Вялікабрытаніі. Яна і Лэдсам набралі большасьць галасоў у ходзе другога тура выбараў лідэра Кансэрватыўнай партыі.
Мэй выступала супраць выхаду Брытаніі зь Эўрапейскага саюзу, Лэдсам — за хутчэйшы выхад.
Лідэр Кансэрватыўнай партыі стане наступным прэм’ер-міністрам Вялікабрытаніі замест Кэмэрана, які абвясьціў аб адстаўцы пасьля рэфэрэндуму, на якім брытанскія выбаршчыкі вырашылі выйсьці з Эўразьвязу.
Самае папулярнае
1
