На выбарах кіраўніка брытанскіх кансэрватараў лідзіруюць дзьве жанчыны. Тэрэза Мэй і Андрэа Лідсам набралі большасьць галасоў у выніку другога туру выбараў лідэра Кансэрватыўнай партыі Вялікай Брытаніі.
Пра гэта заявіў Грэм Брэйдзі, палітык брытанскай кансэрватыўнай партыі і член парлямэнту, выступаючы сёньня ў Лёндане.
Галасы, пададзеныя за кандыдатаў у другім туры, разьмеркаваліся наступным чынам: Майкл Гоў — 46 галасоў, Андрэа Лідсам — 84 галасы, Тэрэза Мэй — 199 галасоў. Такім чынам, Майкл Гоў, які набраў найменшую колькасьць галасоў, выключаны з галасаваньня. Тэрэза Мэй, якая займае пасаду міністра ўнутраных спраў і Андрэа Лідсам, якая займае пасаду малодшага міністра энэргетыкі, будуць вылучаныя кандыдатамі ў лідэры кансэрватыўнай партыі.
Лідэр Кансэрватыўнай партыі будзе наступным прэм’ер-міністрам Вялікай Брытаніі замест Дэвіда Кэмэрана, які абвясьціў аб адстаўцы пасьля рэфэрэндуму, на якім брытанскія выбаршчыкі вырашылі выйсьці з Эўразьвязу.
Тэрэза Мэй выступала супраць выхаду Брытаніі з ЭЗ, а Андрэа Лідсам — за хутчэйшы выхад.
Самае папулярнае
1