Сход разышоўся, праграма прынятая

Пяты Ўсебеларускі народны сход завяршыўся 23 чэрвеня ў менскім Палацы Рэспублікі. Аляксандар Лукашэнка выступіў з заключным словам на закрыцьці форуму.

Падчас учорашняга выступу, які нагадваў даклад генсека КПСС, Лукашэнка проста зачытаў праграму на «пятую пяцігодку», абяцаньні якой былі вядомыя загадзя. Прамога прызнаньня поўнага правалу праграмы на «чацьвёртую пяцігодку» не было.

Усебеларускі народны сход, які Лукашэнка называе «найвышэйшай формай дэмакратыі», звычайна склікаецца перад прэзыдэнцкімі выбарамі, але сёлета быў скліканы ўжо па выбарах. 2500 дэлегатаў, якія абіраюцца не народам, а «ад працоўных калектываў» (што не дапускае на сход іншадумцаў), ня маюць акрэсьленых заканадаўчых, выканаўчых і любых іншых паўнамоцтваў. Толькі на падарункі дэлегатам сышло паўмільёна даляраў.