Лінкі ўнівэрсальнага доступу

Расея правалілася на кітайскім анлайн-рынку. Беларусь нават не спрабавала


Пэрсанаж японскага анімэ «Hetalia: Axis Powers», чыя сукенка — адзін з самых папулярных тавараў па запыце Belarus на AliExpress. Зробленая яна, як і астатнія тавары на пляцоўцы, не ў Беларусі
Пэрсанаж японскага анімэ «Hetalia: Axis Powers», чыя сукенка — адзін з самых папулярных тавараў па запыце Belarus на AliExpress. Зробленая яна, як і астатнія тавары на пляцоўцы, не ў Беларусі

Пілётны праект па прасоўваньні расейскай прадукцыі на найбуйнейшым інтэрнэт-кірмашы, кітайскай анлайн-пляцоўцы AliExpress, па сутнасьці праваліўся, піша расейскі «КоммерсантЪ».

За некалькі месяцаў паступіла толькі 24 замовы на тавары расейскіх кампаніяў, прадстаўленыя ў межах акцыі «Мода. Сдалано в России», хоць прапановы праглядалі 130 тысяч чалавек.

Расейскі Мінпрам спасылаецца на «глюкі» кітайскай пляцоўкі, AliExpress жа бачыць прычыну нізкіх продажаў у «неапраўдана высокіх коштах і адсутнасьці арыгінальнасьці».

Беларусь на AliExpress: толькі сьцягі і касплэй

У канцы 2015 года міністар інфармацыі Беларусі Лілія Ананіч анансавала абмеркаваньне пытаньня прасоўваньня беларускіх тавараў на тым самым AliExpress. Як распавядала Ананіч, прадстаўнікі Беларускай унівэрсальнай таварнай біржы езьдзілі ў Кітай і дамаўляліся пра сустрэчы з прадстаўнікамі кітайскіх пляцовак, якім «патрэбныя навінкі, якасны замежны тавар сярэдняга цэнавага сэгмэнту».

Старонка тавару на AliExpress
Старонка тавару на AliExpress

Тым ня меней, па запыце «Belarus» на AliExpress знаходзяцца найперш сьцягі (бел-чырвона-белыя і чырвона-зялёныя) і чахлы для тэлефонаў з гэтымі сьцягамі, памятныя манэты і старыя купюры, а таксама кітайскія сукенкі пэрсанажа Беларусь зь японскага анімэ «Hetalia: Axis Powers», дзе пэрсанажамі выступаюць краіны (пераапрананьне ў герояў анімэ ці коміксаў і «іграньне» іх роляў — папулярная ў пэўных колах забава, вядомая пад назвай касплэй).

Тавары «Беллегпраму», якія зьбіраліся прасоўваць на AliExpress, ці адсутнічаюць, ці не шукаюцца па назвах прадпрыемстваў. «Купалінкі», «Сьвітанка», «Элемы» ці «Мілавіцы» кітайскі сайт у сваім каталёгу не знаходзіць. А па запыце «Mark Formelle» знаходзіцца што заўгодна, акрамя беларускай прадукцыі: напрыклад, кітайскія тавары кшталту «3 серебряные контакты аварийной кнопку нажать XB2-B211H29 с двумя даже кнопки окно» ці «осень И Зима мужская Даже КРЫШКА Свитер» (напісаньне захаванае).

Для прасоўваньня беларускай прадукцыі за мяжой у лютым 2016 года таксама быў прадстаўлены сайт ByExport.com. На момант прэзэнтацыі ён практычна ня ўтрымліваў тавараў і кампаніяў ды меў толькі расейскую вэрсію. За чатыры месяцы дзейнасьці на ім зьявілася ангельская вэрсія і «прадстаўніцтвы» вялікай колькасьці беларускіх кампаніяў. Але большасьць «прадстаўніцтваў» пустыя: калі ў лютым на «экспартным» сайце было прадстаўлена 217 тавараў ад 15 кампаніяў, на момант публікацыі было ўжо тры сотні кампаніяў, але толькі 401 тавар. Дагэтуль на сайце не падаюцца прамыя кантакты і спасылкі на сайты прадпрыемстваў, а толькі «форма для сувязі», паведамленьні зь якой накіроўваюцца на неназваны адрас.

Відаць, у галіне анлайн-гандлю адзінай мерай зь беларускага боку стала ўвядзеньне падатку для беларусаў на замежныя пасылкі.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG