Лінкі ўнівэрсальнага доступу

Cьвет пабіў 25-гадовы рэкорд ваяўнічасьці. Беларусь троху памірнела


Беларусь на 106 месцы са 163 краінаў у Рэйтынгу міру. Расея ж абганяе Паўночную Карэю па ваяўнічасьці.

Згодна з Усясьветным рэйтынгам міру (Global Peace Index, PDF), летась колькасьць ахвяраў збройных канфліктаў дасягнула самага высокага ўзроўню за апошнія 25, калі не 35 год.

Уцекачоў у 2015 годзе 57 мільёнаў, што ў два разы больш за 2007 год. У Сырыі зьнешнімі і ўнутранымі ўцекачамі сталі 60% насельніцтва, у Самалі і Паўднёвым Судане — больш за 20%.

На вайсковыя канфлікты за 2015 год чалавецтва патраціла $13,6 трлн (па $1876 на зямляніна), гэта 13,3% усясьветнай эканамічнай актыўнасьці.

Колькасць ахвяраў узброеных канфліктаў за 65 (зьлева) і 25 (справа) год
Колькасць ахвяраў узброеных канфліктаў за 65 (зьлева) і 25 (справа) год

Беларусь у рэйтынгу разьмясьцілася на 106 месцы сярод 163 краінаў сьвету, цяпер яна мае 2,202 бала «ваяўнічасьці», за год аднялося 0,035 бала. У рэйтынгу ўлічваліся бягучыя ўнутраныя і міжнародныя канфлікты, сацыяльная бясьпека і ўзровень мілітарызаванасьці.

Па межах Беларусі праходзіць падзел між эўрапейскімі краінамі з высокім узроўнем міру — і Расеяй ды Ўкраінай, дзе ўзровень міру вельмі нізкі. Польшча на 22 месцы ў сьвеце, Латвія — на 32-м, Літва — на 37-м. Расея на другім канцы сьпісу, на 151 месцы, акурат за Паўночнай Карэяй. Украіна яшчэ ніжэй, на 156 месцы, паміж Суданам і ЦАР.

Самымі неспакойнымі застаюцца Ірак, Паўднёвы Судан і Сырыя, сытуацыя ў іх толькі пагаршаецца. Самыя ж мірныя — Ісьляндыя, Данія і Аўстрыя.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG