Прэзыдэнт ЗША Барак Абама коратка пагаварыў зь пілётам эскадрыльлі Thunderbirds, які пацярпеў аварыю ў раёне Каларада-Спрынгс. Пра гэта паведаміла прэс-служба Белага дома.
Зьнішчальнік са складу дэманстрацыйнай эскадрыльлі ВПС ЗША Thunderbirds ( «Буравесьнікі») пацярпеў катастрофу на поўдзень ад горада Каларада-Спрынгс. Як паведаміла агенцтва Асашыэйтэд Прэс, лётчыку ўдалося катапультавацца і шчасна прызямліцца з парашутам. Прэзыдэнт ЗША падзякаваў пілёта за службу і выказаў палёгку, што пілёт ня быў сур’ёзна паранены. Прэзыдэнт таксама падзякаваў выратавальным службам, якія дзейнічалі хутка і апэратыўна, каб дапамагчы пілёту.
Прэзыдэнт ЗША знаходзіўся ў ваенна-паветранай акадэміі на выпуску афіцэраў ВПС ЗША. У сваім выступе Абама перасьцярог амэрыканцаў ад ізаляцыянізму.
