Лінкі ўнівэрсальнага доступу

«Міліцыянтка абражала і зьневажала ўдзельнікаў каталіцкай працэсіі ў Менску»


Супрацоўніца праваахоўных органаў у цывільным, якая абражала вернікаў

Штогадовую працэсію вуліцамі Менску з нагоды каталіцкага сьвята Цела і Крыві Хрыста сёлета суправаджала мноства супрацоўнікаў спэцслужбаў, якія фільмавалі ўдзельнікаў шэсьця.

Некаторыя зь сілавікоў абражалі вернікаў і пагражалі затрыманьнямі.

Практыкуючая верніца Ірэна, якая ішла ў такой працэсіі ўжо ня першы раз сказала Свабодзе:

«Увогуле, я лічу, што такія шэсьці павінны праходзіць з удзелам праваахоўных органаў. Бо гэткая колькасьць людзей, а раптам што здарыцца. Сёлета, калі працэсія дайшла да Рускага тэатру, я паднялася на прыступкі, каб сфатаграфаваць шэсьце з вышыні. Побач было шмат нашых каталікоў, карэспандэнтаў, якія таксама здымалі. І раптам у аднаго чалавека з камэрай спрацавала рацыя — тады мне стала зразумела, што гэта за чалавек і што гэта за здымкі. А ён стаяў і плянамерна здымаў з адной кропкі, з адным фокусам усю працэсію, усіх, хто ўдзельнічаў — яны рабілі свой сьпіс».

Вернікі падчас працэсіі
Вернікі падчас працэсіі

Як распавядае спадарыня Ірэна, калі працэсія ўжо завяршалася і калёна падыходзіла да Катэдральнага касьцёла, міліцыянт у форме і жанчына пачалі «адсякаць» галаву працэсіі — дзе былі сьвятары, абразы і харугвы — ад астатніх людзей.

«Гэтая жанчына літаральна стала грудзьмі, маўляў, далей ніхто не ідзе. А за намі — тысячы людзей, якія працягваюць падыходзіць, і ім літаральна не было дзе падзецца. У выніку на першых, прыпыненых людзей, націснулі тыя тысячы людзей, якія падыходзілі, і ўсе рушылі далей да касьцёла. І тады гэтая жанчына пачала абражаць і зьневажаць людзей, маўляў, куды вы ўсе працеся, каб вы гэтак у касьцёлы хадзілі, я сама каталічка, але такіх каталікоў ніколі ня бачыла».

Спадарыня Ірэна паспрабавала спыніць міліцыянтку.

Падчас працэсіі
Падчас працэсіі

«Тады яна пачала крычаць на мяне і казаць, што я апазыцыянэрка. Я ў сваю чаргу запыталася хто яна такая і як яе зваць, але яна мне раз-пораз крычала — „закрый рот“. Гэта бачылі і чулі многія людзі, і яны казалі — маўляў, калі яна не называецца, то сфатаграфуйце яе. Калі ж я сфатаграфавала, яна падышла да мяне, дастала свае тэлефоны-дыктафоны і стала патрабаваць паказаць фотаапарат са здымкамі, мой пашпарт. Я папрасіла паказаць дакумэнты і пасьпела прачытаць прозьвішча — Шрамковіч. У мяне пашпарта не было, і яна тады сказала, што дачакаемся, калі ўсе разыдуцца, і паедзем з вамі ў райаддзел».

Калі працэсія скончылася і людзі сталі разыходзіцца, спадарыня Ірэна пайшла дадому.

«Але ці завяршылася для мяне гэтая гісторыя, я пакуль ня ведаю. Я ніколі не сустракалася з такімі паводзінамі супрацоўнікаў міліцыі і была вельмі ўражаная, тым больш што гэта была жанчына. Яна паводзіла сябе як правакатарка, распаляючы ў людзях злосьць і нянавісьць. Гэтая міліцыянтка крычала, што яна каталічка — можа, і ахрысьцілі яе ў касьцёле, але тое, што яна нават не хрысьціянка, дык гэта відавочна. Яна ня мае любові ў сэрцы да людзей. Гэта сорам для нашага МУС, што яны бяруць на працу такіх жанчын».

Глядзець камэнтары (7)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG