Першы намесьнік прэмʼер-міністра Беларусі Васіль Мацюшэўскі заяўляе, што сёлета разьвіцьцё эканомікі краіны ідзе па пэсымістычным сцэнары. Пра гэта паведамляе Інтэрфакс-Захад.
«Па росьце эканомікі ідзем у рамках пэсымістычнага прагнозу», — сказаў Мацюшэўскі, выступаючы ў Палаце прадстаўнікоў у пятніцу ў Менску.
Ён канстатаваў, што ў 2016 годзе ўрад сумесна з Нацбанкам рэалізуе меры макраэканамічнага балянсаваньня ва ўмовах, якія значна горшыя за ўмовы папярэдняга году.
«Няўстойлівасьць на нафтавым, калійным і іншых сыравінных рынках прывяла да падзеньня вартасных аб’ёмаў экспарту на 16,7%. Бюджэт пры гэтым недаатрымаў даходы. У першым квартале даходы ад мыта на нафтапрадукты склалі толькі 140 мільёнаў даляраў пры гадавым пляне ў 1,1 мільярда даляраў» — сказаў першы віцэ-прэмʼер.
