Прэзыдэнт ЗША Барак Абама пацьвердзіў 23 траўня, што лідэр талібаў мула Ахтар Мансур быў забіты. Амэрыканскі лідэр назваў яго сьмерць «важнай вяхой» у намаганьнях па дасягненьні міру ў Аўганістане.
«Мы ліквідавалі лідэра арганізацыі, якая працягвае зьдзяйсьняць напады на амэрыканскія і кааліцыйныя сілы, ваяваць супраць аўганскага народа і ставіць сябе ў адзін шэраг з такімі экстрэмісцкімі групамі, як «Аль-Каіда», — сказаў Абама.
Аўганскія ўлады таксама пацьвярджаюць, што Мансур быў забіты ў пачатку 21 траўня ў выніку нападу амэрыканскага бесьпілётніка ў паўднёва-заходняй пакістанскай правінцыі Белуджыстан, на самай мяжы з Аўганістанам.
Міністэрства замежных спраў Пакістану раскрытыкавала напад як парушэньне сувэрэнітэту, заявіўшы, што Злучаныя Штаты не паведамілі Ісламабаду пра зьдзяйсьненьне нападу.
Ахтар Мансур быў абвешчаны лідэрам талібаў у ліпені 2015 году пасьля пацьверджаньня дадзеных аб сьмерці папярэдняга лідэра талібаў мулы Махамада Амара.
