Лінкі ўнівэрсальнага доступу

У Беларусі прыведзены ў выкананьне чарговы сьмяротны прысуд


6 траўня стала вядома пра выкананьне сьмяротнага прысуду адносна жыхара Рэчыцы Сяргея Іванова. У сакавіку 2015 году ён прызнаны вінаватым у жорсткім забойстве знаёмай дзяўчыны і прыгавораны да расстрэлу.

Каардынатар кампаніі «Праваабаронцы супраць сьмяротнага пакараньня» Андрэй Палуда паведаміў агенцтву БелаПАН, што Іванова вывелі з камэры СІЗА № 1 Менска ў ноч з 17 на 18 красавіка. Пра тое, што сьмяротны прысуд прыведзены ў выкананьне, сваякам паведамілі пасьля 1 траўня.

«Найбліжэйшым часам яны павінны забраць пасьведчаньне аб сьмерці. Асабістыя рэчы асуджанага пакуль не вярнулі», — адзначыў праваабаронца.

Згодна зь беларускім заканадаўствам, сваякам не выдаюць цела асуджанага, а таксама не паведамляюць пра месца яго пахаваньня.

Вядома, што Іваноў зьвяртаўся з прашэньнем аб памілаваньні на імя Аляксандра Лукашэнкі і накіроўваў скаргу ў Камітэт па правах чалавека ААН. Адказ зь міжнароднай структуры пакуль не паступаў. Нягледзячы на гэта, прысуд прыведзены ў выкананьне.

Зараз у «калідоры сьмерці» у СІЗА № 1 знаходзяцца тры чалавекі, прыгавораныя да выключнай меры пакараньня: Іван Кулеш (жорсткае забойства трох чалавек), Генадзь Якавіцкі (жорсткае забойства аднаго чалавека), Сяргей Хмялеўскі (жорсткае забойства трох чалавек).

Беларусь застаецца адзінай краінай у Эўропе і на ўсёй постсавецкай прасторы, дзе да гэтага часу ўжываецца сьмяротнае пакараньне. З 1991 году да расстрэлу прыгаворана больш за 400 чалавек, Лукашэнка памілаваў толькі аднаго асуджанага.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG