Лінкі ўнівэрсальнага доступу

У сьвеце ўзгадваюць ахвяраў катастрофы на Чарнобыльскай АЭС


У аўторак адзначаецца 30-годзьдзе аварыі, якая стала найбуйнейшай у гісторыі сусьветнай атамнай энэргетыкі.

У Беларусі, ва Ўкраіне і ў Расеі, у краінах Эўропы і ў ЗША ўзгадваюць ахвяраў катастрофы на Чарнобыльскай атамнай станцыі, якая адбылася 30 гадоў таму.

Прэзыдэнт Беларусі Аляксандар Лукашэнка 26 красавіка адправіцца ў рэгіёны, пацярпелыя ад катастрофы. Менскі выканкам даў дазвол на правядзеньне акцыі беларускай апазыцыі «Чарнобыльскі шлях». Пра гэта паведаміў у «Фэйсбуку» лідэр партыі БНФ Аляксей Янукевіч.

Кабінэт міністраў Украіны аднавіў права на даплаты для грамадзян, якія працуюць у зоне адчужэньня Чарнобыльскай АЭС. Пра гэта гаворыцца ў паведамленьні на сайце ўраду Ўкраіны. Гендырэктар ЧАЭС Ігар Грамоткін заклікаў Маскву і Кіеў аднавіць супрацоўніцтва па Чарнобылі. Па словах дырэктара, ядзерная бясьпека — гэта сфэра дзейнасьці, якая знаходзіцца па-за межамі палітычных адносінаў.

На Міцінскіх могілках Масквы ў сераду пройдзе жалобны мітынг, прысьвечаны гадавіне аварыі. На могілках адкрыта Алея Славы, на якой пахаваныя 28 пажарных з Расеі, Украіны і Беларусі, якія загінулі пры ліквідацыі аварыі на ЧАЭС.

Урад ЗША дасьць Украіне дадаткова 10 мільёнаў даляраў на ліквідацыю наступстваў аварыі на Чарнобыльскай атамнай электрастанцыі. Пра гэта паведаміў у панядзелак кіраўнік прэс-службы Дзярждэпартамэнту ЗША Джон Кірбі ў сувязі з 30-й гадавінай катастрофы ў Чарнобылі.

Ён адзначыў, што ЗША назіраюць прагрэс у стварэньні новага, разьлічанага на эксплюатацыю на працягу 100 гадоў, сховішча для чацьвёртага энэргаблёку АЭС, на якім у 1986 годзе адбыўся выбух. Вашынгтон мае намер працягваць працаваць з Кіевам і міжнароднымі партнэрамі над паляпшэньнем умоваў жыцьця ў зоне аварыі і ва ўсёй краіне, заявіў Кірбі.

Эўрапейская камісія абавязалася ў панядзелак перавесьці на рахунак «ядзернай бясьпекі» каля 20 мільёнаў эўра, якія зьяўляюцца часткай траншу, што ўносіць Эўразьвяз і краіны «Вялікай сямёркі» ў дадатак да ўжо выдаткаванай дапамогі па ліквідацыі наступстваў чарнобыльскай катастрофы.

У выніку выбуху на станцыі быў цалкам разбураны чацьвёрты энэргаблёк ЧАЭС. Аварыя, паводле ацэнак спэцыялістаў, стала найбуйнейшай за ўсю гісторыю атамнай энэргетыкі.

Ігар Лосік Кацярына Андрэева Ірына Слаўнікава Марына Золатава Ягор Марціновіч

Самае папулярнае

XS
SM
MD
LG