Pajhwok Afghan News перадае, што ў выніку выбуху забітыя прынамсі 6 чалавек, больш за 20 атрымалі раненьні. Пры гэтым аўганскае агенцтва Khaama Press сьцьвярджае пра 30 загінулых. Паводле зьвестак СМІ, тэрарыст-сьмяротнік падарваў сябе побач з будынкам выведслужбаў рэспублікі. Пакуль ніводная з экстрэмісцкіх груповак не ўзяла на сябе адказнасьць за тэракт.
Паводле інфармацыі Reuters, у шпіталі дастаўленыя восем параненых вайскоўцаў.
Выбух прагрымеў у цэнтры сталіцы Аўганістана раніцай у аўторак. Каля амбасады ЗША ў цэнтры горада былі чуваць гукі сырэнаў, у небе быў бачны густы дым. Побач з амбасадай знаходзіцца штаб-кватэра місіі НАТО ў Аўганістане. Гэтыя будынкі выбухам закранутыя не былі.
Пазьней СМІ паведамілі, што паблізу будынка Ўпраўленьня нацыянальнай бясьпекі Аўганістана падарваўся начынены выбухоўкай аўтамабіль.
