Перад гледачамі «Мінск-Арэны» выступіць Нік Вуйчыч, аўстралійскі матывацыйны прапаведнік, мэцэнат, пісьменьнік. Вуйчыч нарадзіўся без рук і ног, пераадолеў абмежаваньні сваёй інваліднасьці і кажа, што яго місія — памагчы людзям знайсьці свой шлях у жыцьці і яго мэты. Выступ у «Мінск —Арэне» а 19-й, прэс-канфэрэнцыя адбудзецца ў Галерэі TUT.BY а 11-й.
Гурт «Стары Ольса» прэзэнтуе новы альбом «Кола рыцэрска». Тэатр эстрады, вул. Маскоўская, 18а, пачатак а 19-й.
Выстава «Хрыстос уваскрос на ўвесь сьвет» адкрыецца ў Дзяржынскім гісторыка-краязнаўчым музэі. Экспазыцыя дазволіць прайсьці шлях ад Вербнай нядзелі да Вялікадня. На ёй кожны зможа акунуцца ў хатнюю атмасфэру сьвяточных дзён праз атрыбуты матэрыяльнай культуры, знаёмства з кулінарнымі традыцыямі, народнымі гульнямі і забавамі. Дзяржынск, вул. Ленінградзкая, 6. Пачатак а 15-й.
Гэты дзень у гісторыі:
1432 — вялікі князь літоўскі Жыгімонт Кейстутавіч аднавіў дзяржаўную вунію з Польшчай, скасаваную вялікім князем Сьвідрыгайлам.
1783 — Утвораная каталіцкая Магілёўская архідыяцэзія.
1896 — У Атэнах скончылася першая Алімпіяда, упершыню адроджаная з часоў антычнасьці.
1855 — Канстанцін Вераніцын у Гарадку на Віцебшчыне завяршыў працу над паэмай «Тарас на Парнасе», якая пасьля будзе доўгі час лічыцца ананімнай. Толькі зусім нядаўна беларускім архівістам удалося знайсьці аўтарскі асобнік паэмы.
1912 — у Атлянтычным акіяне пасьля сутыкненьня з айсбэргам патануў брытанскі карабель «Тытанік».
1919 — Дэкрэтам савецкай улады аб стварэньні сыстэмы папраўча-працоўных лягераў быў пакладзены пачатак утварэньня ГУЛАГу.
1992 — Беларусь усталявала дыпляматычныя адносіны з Канадай.
2005 — Вярхоўны суд Беларусі задаволіў пазоў міністэрства юстыцыі аб закрыцьці сацыялягічнага цэнтру НІСЭПД.
2012 — з Магілёўскай калёніі № 15 быў вызвалены Зьміцер Бандарэнка, давераная асоба кандыдата ў прэзыдэнты Андрэя Саньнікава, каардынатар грамадзянскай кампаніі «Эўрапейская Беларусь».
2013 — Падчас маратону ў амэрыканскім Бостане адбылася сэрыя выбухаў, у выніку якіх 5 чалавек загінулі і 264 былі параненыя.
У гэты дзень нарадзіліся:
1452 —Леанарда да Вінчы, мастак, архітэктар і навуковец
1886 — Мікалай Гумілёў, расейскі паэт
1912 — Кім Ір Сен, камуністычны дыктатар Паўночнай Карэі, дзень нараджэньня Кім Ір Сэна адзначаецца ў КНДР як сьвята Сонейка.
У гэты дзень памерлі:
1765 — Міхаіл Ламаносаў, расейскі навуковец і паэт.
1847 — Станіслаў Юндзіл, прыродазнаўца, адзін з першых дасьледчыкаў расьліннага і жывёльнага сьвету Беларусі, доктар філязофіі і тэалёгіі.
1865 — Абрагам Лінкальн, 16-ы прэзыдэнт ЗША, пераможца ў Грамадзянскай вайне, забіты ў выніку замаху.
1980 — Жан-Поль Сартр, францускі пісьменьнік і філёзаф, ляўрэат Нобэлеўскай прэміі па літаратуры за 1964 год.
2015 — айцец Надсан, беларускі грэка-каталіцкі сьвятар, апостальскі візытатар для беларусаў-каталікоў у замежжы.
Цытата
Калі вашы пакуты невыносныя, пастарайцеся аблягчыць жыцьцё іншага чалавека і падарыць яму надзею.
Нік Вуйчыч.