Лінкі ўнівэрсальнага доступу

Колькі дзяржава зэканоміць на пэнсіянэрах? Камэнтуюць экспэрты


Ілюстрацыйнае фота

Прэс-служба Аляксандра Лукашэнкі паведамляе, што ягоным сёньняшнім указам прадугледжваецца зь 1 студзеня 2017 году паэтапнае штогадовае павышэньне на 6 месяцаў пэнсійнага ўзросту да дасягненьня мужчынамі 63 гадоў, жанчынамі — 58 гадоў.

Павялічваецца таксама на 3 гады за 6 гадоў узрост, які дае права на льготныя працоўныя пэнсіі і пэнсіі за выслугу гадоў.

Сасноў: Пасьля павышэньня пэнсійнага ўзросту стане яшчэ горш

Указ, падпісаны Аляксандрам Лукашэнкам 11 красавіка — «Аб удасканаленьні пэнсійнага забесьпячэньня», — былы міністар працы Беларусі Аляксандар Сасноў камэнтуе як меру, вымушаную эканамічным крызісам:

Аляксандар Сасноў
Аляксандар Сасноў

«Паколькі паднялі толькі пэнсійны ўзрост і за апошнія больш як 20 год нічога не зрабілі іншага, то няма чаго чакаць. Празь нейкі час сытуацыя ў пэнсійнай сыстэме зноў будзе дрэнная. Яна і цяпер дрэнная, а стане яшчэ горш. Улады нічога не зрабілі, апроч таго, што навідавоку — паднялі пэнсійны ўзрост.

Рашэньне замацоўваецца ўказам прэзыдэнта. Чаму? Таму што так званы парлямэнт, „палатка“ — гэта не заканатворчы орган, а канцылярыя пры прэзыдэнце, якая падпісвае тыя паперы, якія ён ім пастаўляе. А нашто цягнуць час? Ён прымае ўказы, таму што дыктатура ў краіне».

Ярашук: У шкодных умовах шмат хто не дажыве да пэнсіі

Старшыня Беларускага кангрэсу дэмакратычных прафсаюзаў Аляксандар Ярашук кажа, што эканамічных праблемаў гэты ўказ ня вырашыць:

Аляксандар Ярашук
Аляксандар Ярашук

«Тое, што праблема, зьвязаная з пэнсійнай сыстэмай, існавала, мы ведалі і бачылі ўжо даўно. Але з усіх варыянтаў вырашэньня праблемы ўлады абралі самы кепскі. Зрэшты, гэта і ёсьць адметнай рысай гэтай улады. Можна толькі яшчэ раз пашкадаваць і абурыцца, што беларускі рэжым так цынічна ставіцца да сваіх грамадзянаў.

Атрымлівацца, што вельмі складаную праблему прэзыдэнт сваім указам вырашае вельмі проста — мэханічным падвышэньнем пэнсійнага ўзросту.

Але можна казаць абсалютна адказна: аніякіх стратэгічных выйгрышаў ва ўлады ня будзе, а вось што тычыцца нэгатыву — то ён гарантаваны. І гэта нэгатыў непасрэдна для грамадзянаў краіны.

У глябальным пляне ўказ нічога не вырашае, проста вастрыня праблемы на непрацяглы час будзе зьменшаная. Але якія наступствы...

Значная частка людзей, асабліва што тычыцца шкодных умоваў працы, проста ніколі ў сваім жыцьці не атрымае пэнсію. Гэта першае.

Другое. У сытуацыі, калі імкліва расьце беспрацоўе, павышэньне пэнсійнага ўзросту толькі абвострыць гэтую праблему, бо маладым спэцыялістам ня будзе куды прыходзіць — працоўныя месцы ўсё яшчэ будуць занятыя тымі, хто яшчэ будзе дапрацоўваць да пэнсіі.

Такім чынам, зноў можна канстатаваць схільнасьць уладаў да простых рашэньняў вельмі складаных праблемаў па прынцыпе „дзень прастаяць і ноч пратрымацца“. І нясхільнасьць зазіраць наперад больш як на пару гадоў».

Раманчук: Гэтую меру Менск будзе спрабаваць прадаць МВФ як пэнсійную рэформу, каб атрымаць грошы

Кіраўнік фонду Мізэса Яраслаў Раманчук лічыць, што падвышэньне пэнсійнага ўзросту на эканоміку Беларусі істотна не паўплывае:

Яраслаў Раманчук
Яраслаў Раманчук

«Тое, што падвысілі пэнсійны ўзрост, гэта толькі на адсотак ці нават долю адсотка павялічвае стабільнасьць пэнсійнага фонду. Прычым асноўная праблема ў тым, што з-за крытычнага фінансавага стану прадпрыемстваў плацяжы ў пэнсійны фонд значна панізіліся. Зразумела, што ўказ Лукашэнкі — гэта ніякая не пэнсійная рэформа, а проста спроба заткнуць дзірку ў бюджэце. Але гэтую меру афіцыйны Менск будзе спрабаваць прадаць Міжнароднаму валютнаму фонду як пэнсійную рэформу, каб атрымаць грошы».

Ігар Лосік Кацярына Андрэева Ірына Слаўнікава Марына Золатава Ягор Марціновіч
XS
SM
MD
LG