«Камэнтаваць шпіёнскія раманы — справа няўдзячная. Аўтары пакрыўдзяцца, а аматары жанру будуць расчараваныя». Так прэс-сакратар МЗС Беларусі Дзьмітры Мірончык пракамэнтаваў ацэнку пагроз нацыянальнай бясьпецы, апублікаваную ўладамі Літвы.
У дакумэнце, сярод іншага, гаворыцца, што палова дыпляматаў амбасады Беларусі ў Вільні — супрацоўнікі беларускіх спэцслужбаў.
У штаце амбасады Беларусі ў Літве ёсьць афіцыйны прадстаўнік КДБ Беларусі, які цалкам афіцыйна пісьмова прадстаўлены ў гэтай якасьці кіраўніцтву органаў дзяржбясьпекі, спэцслужбам Літвы. Таксама ў штаце пасольства знаходзяцца вайсковы аташэ і памочнік вайсковага аташэ, якія абсалютна афіцыйна прадстаўляюць у Літве Ўзброеныя сілы Беларусі, сказаў Мірончык РИА Новости.
«Ці ёсьць аналягічныя супрацоўнікі ў літоўскай амбасадзе ў Менску — пытаньне рытарычнае. Розьніца толькі ў тым, што мы, у адрозьненьне ад нашых літоўскіх партнэраў, не захапляемся жанрам шпіёнскага раману», — адзначыў прадстаўнік МЗС Беларусі.