Лінкі ўнівэрсальнага доступу

Brutto ня выступіць у Менску, затое дасьць канцэрт у Вільні


2 красавіка ў межах туру «Родны край» пройдзе канцэрт Brutto. Гэта першы сольны канцэрт гурту ў Вільні. Для яго арганізаваная візавая падтрымка.

Год таму Brutto ўжо выступаў у Вільні — на фэстывалі Belarus Alternative 2015. Гэтым разам яны выступяць з сольным канцэртам у клюбе Loftas, што літаральна за 15 хвілін хады ад чыгуначнага вакзалу.

Канцэрт адбудзецца ў межах туру «Родны край» — аднайменны альбом Brutto выпусьціў у верасьні 2015 году. У яго ўвайшлі дзьве беларускамоўныя песьні, адна зь іх — на словы Янкі Купалы.

27 траўня Сяргей Міхалок зьбіраўся даць канцэрт у менскім Палацы спорту. У сваім відэазвароце ён казаў, што гурт праверылі ва ўсіх сілавых структурах і ведамствах, а ідэолягі ацанілі тэксты.

Але потым з Палаца спорту прыйшла адмова. Абраная гуртам дата выступу аказалася занятая — у гэты дзень тут будуць мантаваць абсталяваньне.

«Ад ідэі правядзеньня канцэрту ў Менску мы не адмаўляемся — цяпер узгадняем іншую дату. У нас няма адчуваньня бегу па зачараваным коле. І сам я аптыміст ды рэаліст», — сказаў Антон Азізбэкян, прадусар гурту, у інтэрвію парталу Tuzin.fm.

Пасьля Вільні паслухаць канцэрт Brutto можна будзе ва Ўкраіне, Польшчы ды Нямеччыне, дзе гурт будзе гастраляваць да канца жніўня.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG