Лінкі ўнівэрсальнага доступу

У Палаце прадстаўнікоў спадзяюцца на міжнародны прарыў — вяртаньне статусу ў ПАРЭ


Будынак ПАРЭ ў Страсбуры, ілюстрацыйнае фота

Экспэрты зазначаюць, што без дэмакратычных парлямэнцкіх выбараў у Беларусі і мараторыю на сьмяротнае пакараньне Парлямэнцкая асамблея Рады Эўропы не запросіць Беларусь у якасьці госьця.

28 студзеня можа стаць значным днём для магчымага вяртаньня Беларусі статусу спэцыяльнага запрошанага ў Парлямэнцкай асамблеі Рады Эўропы (ПАРЭ), заявіў сёньня старшыня міжнароднай камісіі Палаты прадстаўнікоў Віталь Бусько.

Ён паведаміў, што цяпер у Страсбуры знаходзіцца кіраўнік дэлегацыі Нацыянальнага сходу Беларусі па ажыцьцяўленьні кантактаў з ПАРЭ Мікалай Самасейка. У рамках зімовай сэсіі асамблеі ён возьме ўдзел у пасяджэньні камісіі па палітычных пытаньнях і дэмакратыі, якое адбудзецца 28 студзеня. У спадара Самасейкі заплянаваныя сустрэчы з кіраўніцтвам ПАРЭ, некаторымі парлямэнтарамі, службовымі асобамі Рады Эўропы і сакратарыяту ПАРЭ.

«Каб спрагназаваць плён ад гэтых сустрэч, трэба добра ведаць кухню і Парлямэнцкай асамблеі, і самой Рады Эўропы», — кажа Свабодзе намесьнік старшыні руху «За свабоду» палітоляг Алесь Лагвінец:

Алесь Лагвінец
Алесь Лагвінец

«На жаль, у нас няма поўнай інфармацыі, што і як там цяпер робіцца. Таму пакуль можна толькі рабіць дапушчэньні.

Я дапускаю, што пэўны пазытыўны для беларускіх уладаў крок можа быць зроблены. Але сумняваюся, што гэта будзе аднаўленьне статусу спэцыяльна запрошанага. Бо ўсё ж такі ёсьць пакуль яшчэ непераадольныя рэчы ў дачыненьнях з Радай Эўропы. Гэта — адсутнасьць у Беларусі мараторыю на сьмяротнае пакараньне і выбары, якія не прызнаюцца свабоднымі і чэснымі.

Аднаўленьне статусу спэцыяльна запрошанага будзе азначаць, што Рада Эўропы прызнае легітымнасьць Палаты прадстаўнікоў. Але ж добра вядома, што Палата абіралася зь вялікімі парушэньнямі выбарчага заканадаўства і выбарчага працэсу. Па сутнасьці, яе дэпутаты былі прызначаныя Лукашэнкам.

Мне падаецца, што ў Страсбуры будзе зроблена нейкая дэклярацыя. Але ПАРЭ дачакаецца восеньскіх выбараў у Палату прадстаўнікоў і толькі пасьля гэтага канчаткова вызначыцца».

Беларусь атрымала статус спэцыяльна запрошанай у ПАРЭ ўвосень 1992 году. Аднак 13 студзеня 1997 году была яго пазбаўленая, паколькі Бюро асамблеі не прызнала адпаведнымі міжнародным стандартам умовы правядзеньня рэфэрэндуму, які адбыўся ў лістападзе 1996 году.

У чэрвені 2009 году ПАРЭ прыняла рэзалюцыю, у якой гаворыцца, што статус спэцыяльна запрошанага будзе вернуты беларускаму парлямэнту толькі пасьля ўвядзеньня ў краіне мараторыю на сьмяротнае пакараньне.

Чакаецца, што чарговыя парлямэнцкія выбары ў Беларусі адбудуцца 11 верасьня 2016 году. Менавіта гэтую дату як найбольш імаверную назвала старшыня Цэнтральнай выбарчай камісіі Лідзія Ярмошына.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG