Падчас візыту прэзыдэнта Ірану Хасана Рухані ў Італію былі падпісаныя пагадненьні на суму каля 17 млрд даляраў. Пагадненьні з італьянскімі кампаніямі датычацца энэргетыкі і інфраструктуры.
У аўторак спадар Рухані павінен сустрэцца з папам рымскім Францішкам у Ватыкане. Потым ён накіруецца ў Парыж, дзе заплянаванае падпісаньне буйной зьдзелкі па куплі Іранам больш за 100 самалётаў Airbus.
Эўрапейскае турнэ кіраўніка Ірану будзе доўжыцца пяць дзён. Яно закліканае аднавіць сувязі з Захадам пасьля зьняцьця з краіны міжнародных санкцыяў.
У суботу падчас візыту кітайскага лідэра Сі Цзіньпіна ў Іран Пэкін і Тэгеран падпісалі 17 пагадненьняў у розных сфэрах.
