Лінкі ўнівэрсальнага доступу

Праграміста Нацпарка «Белавеская пушча» спрабавалі забраць на вайсковыя зборы проста з працоўнага месца


У рэдакцыю зьвярнуўся 25-гадовы Аляксандр Анішчук, які распавядае, што яго спрабавалі забраць на вайсковыя зборы па пратэрмінаванай позьве. Іншых «рэзэрвістаў» нібыта адвезьлі на вучэньні на мяжу з Украінай.

Аляксандр працуе праграмістам нацыянальнага парка «Белавеская пушча». Нацпарк адносіцца да ведамства Ўпраўленьня справамі прэзыдэнта. 20 студзеня да яго на працу прыйшлі старшыня сельскага савету гарадзкога пасёлка Каменюкі Сяргей Багалейша і былы ўчастковы.

«20 студзеня я прыходжу на працу. Сьледам за мной у кабінэт уваходзіць наш былы ўчастковы і старшыня сельскага савета. Кажуць: паехалі з намі. Я кажу: у мяне праца, я не магу адлучыцца», — распавядае Аляксандр.

У выніку размоваў былы ўчастковы зьездзіў у ваенкамат за позвай і прывез яе да Аляксандра на працу, — працягвае хлапец: «І кажа „распішыся“. Я гляджу: на ёй напісана, што зьявіцца трэба 20 студзеня у 6.30 ранку. А на гадзіньніку 8.15»

Калі Аляксандр запатрабаваў уручыць яму позву ў адпаведнасьці з заканадаўствам, то ўчастковы нібыта проста пры ім выправіў час у позьве на 8.30.

Тым ня менш, Аляксандр на самой позьве напісаў час яе ўручэньня і просьбу ўручыць позву ў адпаведнасьці з заканадаўствам.

Завезьці Аляксандра ў ваенкамат спрабавалі і на наступны дзень. Урэшце, ад яго запрасілі тлумачальную запіску пра няяўку. У ёй хлапец патлумачыў, што позва была пратэрмінаваная, а на працы мусяць знайсьці спэцыяліста, які будзе працаваць за яго.

«Пасьля ваенком мне звоніць і кажа, што мы падаем на цябе дакумэнты ў пракуратуру, „да сустрэчы ў судзе“, — распавядае Анішчук. — Дык я хачу ведаць, хто ў гэтай сытуацыі мае рацыю. Ці маюць права мне ўручаць такую позву?»

«Мая задача была толькі ўручыць яму позву, а далей дакумэнты ідуць у ваенкамат. Яны вырашаюць, што зь ім рабіць, — тлумачыць старшыня сельскага савету Сяргей Багалейша. — Мы ўручылі позву, а далей будуць разьбірацца. Калі ў нашых дзеяньнях ёсьць нейкія парушэньні, мы будзем несьці адказнасьць. Калі ў ягоных — ён будзе несьці адказнасьць».

Сяргей Багалейша кажа, што хлапца папярэджвалі за тыдзень, што будуць выклікаць «на вайсковыя вучэньні» і нават прыходзілі да яго ў інтэрнат, але ён ад іх «хаваўся». Але Алесь гэта абвяргае: «Мне толькі аднойчы пазванілі і папрасілі прыйсьці ў сельскі савет, без тлумачэньняў — чаму. А я працую да шасьці і ня змог пайсьці, — кажа ён. — Пра позву мне ніхто не казаў. А ў інтэрнаце я ж не заўсёды бываю».

Сам Алесь прайшоў ужо тэрміновую службу ў войску. Працу ў Каменюках знайшоў самастойна, пераехаў туды з Берасьця і жыве ў інтэрнаце.

Паводле «Палажэньня аб парадку праходжаньня вайсковых і спэцыяльных збораў», прынятым пастановай № 78 савета міністраў РБ 27 студзеня 2004 году, папярэдзіць прызыўніка абавязаныя за 10 дзён да пачатку правядзеньня вайсковых збораў. Такое ж папярэджаньне мае атрымаць і працадаўца рэзэрвіста. Алесь Анішчук заяўляе, што на працы яго ніхто не папярэджваў і сам ён пытаўся ў аддзеле кадраў, ці быў на яго запыт, але яму адказалі адмоўна.

Радыё Свабода сочыць за разьвіцьцём сытуацыі.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG