Лінкі ўнівэрсальнага доступу

На месцы легендарнага Задзіночаньня беларускіх студэнтаў адкрылася кавярня, якая адмаўляецца абслугоўваць Барака Абаму


На паліцах у кавярні «Чай. Кофе. Потанцуем» стаяць кнігі з былога офіса найбуйнейшай студэнцкай арганізацыі. У 2010-м іх не забраў КДБ.

Новая кавярня працуе на Дарашэвіча, 4. Доўгія гады ў гэтым памяшканьні разьмяшчаўся офіс Задзіночаньня беларускіх студэнтаў. Пазьней — менскае прадстаўніцтва тэлеканалу «Белсат». Інтэр’ер кавярні мала чым адрозьніваецца ад звычайных менскіх, хіба што ўладальнікі і супрацоўнікі моцна захапляюцца разнастайнымі надпісамі і маюць адмысловае пачуцьцё гумару.

На дошцы аб’яваў вісіць і такая: «У сувязі з увядзеньнем санкцыяў ЗША адносна РФ мы ўводзім санкцыі ў адказ. Прэзыдэнт ЗША Барак Абама і члены яго сям’і пазбаўленыя права абслугоўваньня ў нашай установе». Яшчэ адзін надпіс: «Хто ня выкінуў за сабой кубак, той Канчыта Вурст».

«Шок і трымценьне» — апісвае пабачанае прадстаўнік тэлеканалу «Белсат» у Беларусі Міхась Янчук. — Аказваецца, будучыня не заўжды лепшая за мінуўшчыну».

Міхась Янчук
Міхась Янчук

Офіс тэлеканалу «Белсат» месьціўся тут два гады — з 2008 па 2010. Тады гэтае памяшканьне яшчэ было звычайнай трохпакаёвай кватэрай.

«Мы перажылі тут некалькі спробаў уварваньня міліцыі. І ўсе гэтыя спробы былі адбітыя, — згадвае Міхась. — Адзін раз, праўда, нашага журналіста забралі абсьледаваць на прадмет цьвярозасьці, але ён быў, натуральна, цьвярозы і нават на суткі ня сеў.

25 сьнежня 2010 году, калі мы ўжо адсюль практычна зьехалі, гэтую кватэру ўзяў штурмам КДБ, — кажа Міхась. — Яны нават не прыяжджалі вытрасаць ключы, а проста расьпілавалі дзьверы дыскавай пілой. Усярэдзіне знайшлі крыху кніжак, якія цяпер стаяць на гэтых паліцах. Гэта, магчыма, адзіны акцэнт добрых старых часоў».

Як прывітаньне ўварванцам тады ў офісе пакінулі друкарскую машынку з надпісам па-ангельску «Specially for you» і фірмовай стужкай «Белсат».

«Ужо было зразумела ў тыя дні, што аднымі затрыманьнямі не абыдзецца, — распавядае Янчук. — Было ясна, што яны пойдуць па рэдакцыях. Таму мы пачалі вывозіць абсталяваньне, і фактычна ўсё пасьпелі. Застаўся пыласос, 40-гадовая старая друкарка і кніжкі. Мы ў друкарцы пакінулі гэтую паперку з надпісам, стужачку і яшчэ, здаецца, батончык „Сьнікерса“, які ў мяне ў кішэні валяўся».

Міхась Янчук прыехаў у кватэру а пятай гадзіне ранку 25 сьнежня 2010 году. Застаў апячатаныя КДБ дзьверы, ускрытыя дыскавай пілою.

«І, мабыць, вельмі задаволенага кадэбэшніка, якому дасталася такая файная друкарка», — жартуе Янчук.

Доўгія гады ў гэтым памяшканьні знаходзіўся і офіс найстарэйшай студэнцкай арганізацыі — Задзіночаньня беларускіх студэнтаў. Створаную ў 1992 годзе арганізацыю ліквідавалі ў 2001-м па рашэньні суду. У розныя гады старшынямі ЗБС былі Ігар Міхно, Алесь Міхалевіч, Крысьціна Сідун, Вольга Кузьміч і іншыя. ЗБС выдавала часопіс «Студэнцкая думка».

Лёс памяшканьня выглядае пакручастым, але вядома, што з жылога фонду яго вывелі зусім нядаўна. Кавярня працуе там з канца мінулага году. Як сказана ў інтэрвію дырэктара «Чай. Кофе. Потанцуем» рэсурсу «Онлайнер», установа пазыцыянуе сябе як студэнцкая — побач будынкі БНТУ. Атрымаць ад уладальнікаў «Чай. Кофе. Потанцуем» камэнтар наконт таго, ці надпісы на ўваходзе ў кавярню — гэта іхняя афіцыйная пазыцыя, пакуль не ўдалося.

Інтэр'ер кавярні
Інтэр'ер кавярні

Глядзець камэнтары (2)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG