У амэрыканскім штаце Паўднёвая Караліна мусульманаў выгналі зь перадвыбарчай сустрэчы патэнцыйнага кандыдата ў прэзыдэнты ЗША ад рэспубліканцаў мільярдэра Дональда Трампа, вядомага антыісламскімі заявамі.
Ахоўнікі выпіхнулі з залы мусульманіна Джыбрыла Хафа за тое, што ён выкрыкнуў «Праблема не ў ісламе», паведамляе ru.euronews.com.
Мусульманка Роўз Хамід была выгнаная за тое, што была апранутая ў хіджаб, а на яе сукенцы былі напісаныя словы «Салям, я прыйшла зь мірам» і налепленая жоўтая зорка са словам «мусульманін». Жанчына падчас сустрэчы ня вымавіла ні слова.
Адным з пунктаў перадвыбарчай кампаніі Трампа зьяўляецца прапанова ўвесьці забарону на ўезд мусульманаў на тэрыторыю Злучаных Штатаў.
Роўз Хамід патлумачыла матывы свайго зьяўленьня на сустрэчы з Трампам: «Маёй мэтай было даць зразумець людзям, што тое, што кажа Трамп, няварта кандыдата ў прэзыдэнты».
Рада па амэрыкана-ісламскіх адносінах запатрабавала ад Трампа выбачыцца перад Роўз Хамід за выгнаньне са сходу выбарнікаў.