Новы пастаянны прадстаўнік Украіны пры ААН Уладзімер Ельчанка заявіў, што адной з формаў удзелу ААН у дээскаляцыі сытуацыі на Данбасе магло б стаць разгортваньне міратворчай апэрацыі, паведамляе ўкраінская місія пры ААН.
«Мы гатовыя абмяркоўваць мандат і іншыя аспэкты такой апэрацыі. З мэтай вывучэньня сытуацыі на месцы запрашаем ва Ўкраіну ацэначную місію Сакратарыяту ААН», — заявіў Ельчанка, заклікаючы ААН актыўней прычыніцца да замірэньня расейскай агрэсіі.
На погляд Ельчанкі, іншым напрамкам супрацы магло б стаць адкрыцьцё ва Ўкраіне офісу ААН па падтрымцы выкананьня Менскіх дамоўленасьцяў. Такі офіс, сярод іншага, мог бы заняцца каардынацыяй праектаў па разьмініраваньні, абапіраючыся на багаты досьвед ААН у гэтай сфэры. Тым часам прадстаўніцтва Ўкраіны ў ААН будзе ўзмоцненае камандай з 15 украінскіх дыпляматаў.
Дыплямат адзначыў, што адным з прыярытэтаў Украіны стане забесьпячэньне няўхільнага выкананьня палажэньняў статуту ААН, перш за ўсё ў частцы павагі да тэрытарыяльнай цэласнасьці і палітычнай незалежнасьці дзяржаваў. Украіна, кажа ён, аддасьць увагу пытаньням міру і бясьпекі ў Афрыцы і на Блізкім Усходзе, процідзеяньня тэрарызму, абароны цывільных асобаў у збройных канфліктах і нераспаўсюджваньня ядзернай зброі.
Раней Ельчанка казаў у інтэрвію ўкраінскай «Эўрапейскай праўдзе», што такая місія, вядома, нямала б каштавала ўкраінскаму бюджэту. Паводле папярэдніх падлікаў, трэба разгарнуць кантынгент сама менш у 25 тысяч вайскоўцаў, да таго ж на гэтую ідэю, хутчэй за ўсё, наклала б вэта Расея. Але міратворчая місія, лічыць ён, будзе мець эфэктыўнасьць — у адрозьненьне ад цяперашняй місіі АБСЭ, якая можа толькі «хадзіць і запісваць» і «ня здатная і ня мае права прыпыняць нейкія дзеяньні, якія супярэчаць выкананьню менскіх дамоўленасьцяў».