Лінкі ўнівэрсальнага доступу

«Заклікаем урад вярнуцца на шлях розуму»: прадпрымальнікі выступілі з заявай пра каляпс розьнічнага спажывецкага рынку


Гандлёвы цэнтар на рынку Ждановічы ў Менску пустуе, 2 студзеня 2016 году

Рынкі апусьцелі праз «халатнасьць чынавенства», сьцьвярджаецца ў звароце грамадзкага аб’яднаньня «Пэрспэктыва».

Рэспубліканскае грамадзкае аб’яднаньне «Пэрспэктыва», якое яднае прадстаўнікоў малога бізнэсу Беларусі, выступіла з заявай да Адміністрацыі прэзыдэнта і Савету міністраў, у якой рэзка крытыкуе аўтараў указу № 222.

«Па ацэнцы РГА „Пэрспэктыва“, з 1 студзеня 2016 году спынілі працу 90% гандлёвых цэнтраў і рынкаў Рэспублікі Беларусь. Адбыўся каляпс розьнічнага спажывецкага рынку.

Гэтыя падзеі адбыліся з прычыны халатнасьці чынавенства, якое не аддало належнай увагі сытуацыі і праігнаравала шматлікія прапановы прадпрымальніцкай супольнасьці. [Мы] перакананыя, што пустыя рынкі і гандлёвыя цэнтры — гэта найлепшы доказ некампэтэнтнасьці дзяржорганаў і памылковасьці палітыкі рэгуляваньня малога бізнэсу ў Беларусі.

У сытуацыі, якая склалася, гэта шлях вар’яцтва, інакш нельга назваць, калі падчас крызісу ў эканоміцы бяз сродкаў да існаваньня засталося парадку 500 000 чалавек (сем’і прадпрымальнікаў і тыя, хто залежыць ад іх). Мы заклікаем урад вярнуцца на шлях розуму і прыняць своечасовыя адэкватныя рашэньні з улікам меркаваньняў саміх прадпрымальнікаў!».

З усёй Беларусі паступаюць фатаздымкі пустых рынкаў. Старшыня «Пэрспэктывы» Анатоль Шумчанка пацьвердзіў Свабодзе: прадпрымальнікі ня маюць намеру падстройвацца пад указ і будуць «адстойваць права на працу».

Ад 1 студзеня 2016 году беларускія прадпрымальнікі абавязаныя прадаваць тавары прадпрыемстваў лёгкай прамысловасьці краінаў Мытнага саюзу толькі з дакумэнтамі, якія б пацьвярджалі іх легальнае паходжаньне і бясьпеку для спажыўца. Прадпрымальнікі кажуць, што пастаўшчыкі не даюць такіх дакумэнтаў ці падрабляюць іх, у выніку прадаўцам пагражаюць штрафы і канфіскацыі.

Далейшыя свае дзеяньні прадпрымальнікі маюць вызначыць 11 студзеня на антыкрызісным форуме.

Глядзець камэнтары (2)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG