Афіша:
У Вялікай харальнай сынагозе ў Горадні адбудзецца дабрачынны канцэрт Алеся Камоцкага. Пачатак а 18.00.
Лятучы ўнівэрсытэт, грамадзкая культурніцкая кампанія «Будзьма беларусамі» і курсы беларускай мовы «Мова Нанова» прадстаўляюць цыкл лекцый, прысьвечаных Ігнату Абдзіраловічу. А 18.00 у гомельскім тайм-кафэ «ФЛЭТ» прачытае лекцыю філёзаф і літаратар Ігар Бабкоў.
Амбасада Польшчы і Польскі Інстытут у Менску запрашаюць на «Тыдзень польскага тэатру ў Менску», прысьвечаны 250-годзьдзю Нацыянальнага тэатру ў Польшчы. У рамках тыдня пройдзе прэзэнтацыя нумароў альманаху «pARTisan», прысьвечаных польскаму тэатру, а таксама лекцыі, майстар-клас, і сустрэчы зь дзеячамі польскага тэатру. Месца правядзеньня — прастора «ЦЭХ» (вул. Кастрычніцкая, 16). 19 сьнежня а 19.00 лекцыю «Тадэвуш Кантар і тэатар (пост)памяці» прачытае Кляўдыюш Сьвянціцкі (Польшча) .
У межах кампаніі «Будзьма беларусамі!» на Дні сямейнага чытаньня, арганізаванага Цэнтральнай дзіцячай бібліятэкай імя Астроўскага ў Менску, а 14.00 адбудзецца выступ лялечнага тэатрыку «Лямцавая батлейка» са спэктаклем «Мама Му, Крумкач і Каляды» паводле кніжак швэдзкай пісьменьніцы Юі Вісландэр.
У Рамках Менскага міжнароднага каляднага опэрнага форуму, у якім бяруць удзел артысты з 22 краінаў, на сцэне Нацыянальнага акадэмічнага вялікага тэатру опэры і балету адбудзецца пастаноўка опэры «Кармэн».
У гісторыі:
1915 — Казімер Малевіч упершыню апублікаваў у Петраградзе 39 беспрадметных працаў, сярод якіх быў і знакаміты «Чорны квадрат».
1915 — нарадзілася Эдыт Піяф, папулярная француская сьпявачка.
1935 — нарадзілася Валянціна Лемцюгова, беларускі мовазнавец.
2010 — чацьвёртыя прэзыдэнцкія выбары ў Беларусі, падчас якіх мелі месца найбольш масавая за апошнія гады акцыя пратэсту супраць фальсыфікацыі вынікаў выбараў і жорсткі разгон пратэсту уладамі. Былі зьбітыя і затрыманыя сотні чалавек, у тым ліку 5 кандыдатаў у прэзыдэнты.
У памяці:
1995 — памёр Міхаіл Суднік, беларускі мовазнаўца.
2008 — памерла Ніна Мацяш, беларуская паэтка.
Цытата:
«А мне ўсё лепей безь цябе.
Працую — не гарую.
Спакойна сіле не слабець —
Магу зьвярнуць гару я.
Бясплённа дзень не праміне,
На мары не патрачу.
Сьмяюся, калі сьмешна мне,
А плачацца — ня плачу.
Так, мне ўсё лепей безь цябе.
Жніво пасьпела ў часе.
Ні тлуму, ні трывог цяпер.
...І ні хвіліны шчасьця.»
Ніна Мацяш, «Безь цябе...»