Лінкі ўнівэрсальнага доступу

Лукашэнка правядзе перамовы з Бердымухамедавым


Аляксандар Лукашэнка (зьлева) і Гурбангулы Бердымухамедаў

Кіраўнік Беларусі Аляксандар Лукашэнка 10 сьнежня ў Ашхабадзе правядзе перамовы з прэзыдэнтам Туркмэністана Гурбангулы Бердымухамедавым.

Яны пагутараць ў фармаце сам-насам, а потым правядуць перамовы ў пашыраным складзе з удзелам дэлегацый дзьвюх краінаў. Чакаецца падпісаньне шэрагу двухбаковых дакумэнтаў.

Лукашэнка наведае таксама сумесную беларуска-туркмэнскую выставу-кірмаш, Алімпійскі гарадок, возьме ўдзел у міжнароднай канфэрэнцыі «Палітыка нэўтралітэту: міжнароднае супрацоўніцтва ў імя міру, бясьпекі і разьвіцьця», перадае БелТА.

Перад гэтым кіраўнік Беларусі разам з малодшым сынам Мікалаем знаходзіўся зь візытам у Віетнаме. Гэтыя замежныя візыты — першыя для Лукашэнкі пасьля сёлетніх прэзыдэнцкіх выбараў.

Пасьля выбараў Аляксандар Лукашэнка заявіў, што свой першы візыт плянуе зрабіць у Расею на запрашэньне Ўладзімера Пуціна. Ён павінен быў адбыцца 25-26 лістапада, аднак яго перанесьлі «у сувязі з загружанасьцю працоўных графікаў» кіраўнікоў абедзьвюх краінаў.

Гурбангулы Бердымухамедаў кіруе краінай з 2007 году. Сёлета ў Ашхабадзе ўсталявалі першую статую прэзыдэнта Гурбангулы Бердымухамедава. Гэта пазалочаны помнік вышынёй 21 мэтар — кіраўнік дзяржавы на ахалтэкінскім кані з высока ўзьнятай правай рукой. Адкрыць манумэнт пастанавіў парлямэнт «на падставе шматлікіх зваротаў грамадзян».

У Туркмэністан Лукашэнка прылятаў на «Боінгу», які Беларусь набыла ў Turkmenistan Airlines. Раней на гэтым самалёце лётаў сам Туркменбашы Сапармурат Ніязаў, пасьля сьмерці якога новы лідэр Гурбангулы Бердымухамедаў вырашыў гэты борт не выкарыстоўваць.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG