Лінкі ўнівэрсальнага доступу

Яцанюк: Крэмль застаецца забойцам


Арсені Яцанюк

Прэм’ер-міністар Украіны Арсені Яцанюк заяўляе, што «галоўным вінаватым у Галадаморы ва Ўкраіне была Масква, а Крэмль быў і застаецца забойцам».

«Над камуністычным рэжымам і расейскім шавінізмам рана ці позна, але непазьбежна будзе ажыцьцёўлена правасудзьдзе і праведзены міжнародны трыбунал. Галоўным вінаватым у Галадаморы была Масква. Крэмль быў і застаецца забойцам. Галоўным злачынцам, які сплянаваў і зьдзейсьніў акт генацыду супраць украінскага народа, быў таталітарны савецкі камуністычны рэжым», — заявіў Яцанюк, у нядзелю, 29 лістапада, у сваім звароце.

Па словах Арсенія Яцанюка, ідэалягічнай асновай для дзеяньняў савецкага тэрору стаў вялікадзяржаўны расейскі шавінізм.

«Я абвінавачваю расейскі шавінізм у маштабных злачынствах супраць чалавечнасьці. Па ўсім пэрымэтры Расейскай дзяржавы няма ні адной краіны, зь якой Крэмль падтрымліваў бы роўныя і добразычлівыя адносіны. Глыбокая, узроставая хвароба расейскага шавінізму і пагарды да кожнага суседа, яго культуры, мовы або рэлігіі сёньня актыўна заахвочваецца рэжымам прэзыдэнта Пуціна. Фактычна, шавінізм прапаведуецца з самых высокіх катэдраў і духоўных прастолаў Расеі. Паглядзіце, зь якой нянавісьцю і злосьцю шавінізм нават цяпер працягвае адмаўляць Галадамор, абараняючы і аргумэнтуючы людаедзтва Сталіна і ўзводзячы яму помнікі», — адзначыў украінскі прэм’ер.

Яцанюк адзначыў, што падтрымлівае ініцыятыву краінаў Балтыі, якія пачалі працэсы па прыцягненьні да міжнароднай адказнасьці за камуністычныя злачынствы.

28 лістапада ва Ўкраіне ўшанавалі памяць ахвяраў Галадамору, у выніку якіх загінулі мільёны людзей.

24 краіны афіцыйна прызналі Галадамор генацыдам украінскага народа. Расея выступае супраць гэтага.

У сакавіку 2014 году Расея анэксавала ўкраінскі Крым. Украіна і Захад абвінавачваюць Расею ў падтрымцы прарасейскіх сэпаратыстаў на Данбасе. Масква гэтыя абвінавачваньні абвяргае, заяўляючы, што на Данбасе няма рускіх ваенных, але ёсьць «добраахвотнікі».

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG