Лінкі ўнівэрсальнага доступу

NATO пацьвердзіла турэцкую вэрсію зьбіцьця расейскага самалёта


Кіраўнік NATO Енс Столтэнбэрг

Кіраўнік альянсу заклікае Маскву і Анкару захоўваць спакой і задзейнічаць дыпляматыю.

Экстраная нарада NATO ў Брусэлі, сабраная пасьля зьбіцьця туркамі расейскага самалёта Су-24, высьветліла дэталі інцыдэнту ў камандаваньня Турэччыны і шэрагу краінаў альянсу. NATO пацьвердзіла, што расейскі самалёт парушыў межы Турэччыны, ды нагадала пра недатыкальнасьць межаў.

Кіраўнік NATO Енс Столтэнбэрг пераконваў Турэччыну ў тым, што яна можа разьлічваць на альянс у падтрымцы яе тэрытарыяльнай цэласнасьці, але выказаў занепакоенасьць у эскаляцыі напружаньня паміж Масквой і Анкарой. Ён заклікае бакі захоўваць спакой і даць дарогу дыпляматыі:

«Гэта сур’ёзная сытуацыя, што прымушае нас усіх быць асьцярожнымі і прыкласьці намаганьні для яе дээскаляцыі. Я заклікаю Анкару і Маскву да працягу кантактаў.

Дыпляматыя і дээскаляцыя — гэта важныя рэчы для вырашэньня гэтай сытуацыі», — заявіў Столтэнбэрг. Ён пацьвярджае, што прамых кантактаў паміж NATO і Расеяй з нагоды турэцка-расейскага інцыдэнту не было.

Акрамя таго, Столтэнбэрг нагадаў, што, паводле зьвестак NATO, большасьць авіяўдараў, якія расейцы наносяць у Сырыі, нацэленыя не на «Ісламскую дзяржаву» — мішэнь, якая павінна была быць агульнай і для Захаду, і для Расеі.

У пачатку мінулага месяца ледзь удалося пазьбегчы іншага ваеннага канфлікту паміж ВПС Турэччыны і расейскай авіяцыяй: тады турэцкі зьнішчальнік перахапіў расейскі вайсковы самалёт, які парушыў дзяржаўную паветраную прастору, і прымусіў яго вярнуцца назад у Сырыю. Масква тады апраўдалася, спаслаўшыся на «дрэннае надвор’е». Шаснаццатага кастрычніка турэцкія вайскоўцы зьбілі расейскі бесьпілётнік, што таксама знаходзіўся ў паветранай прасторы Турэччыны. Напружанасьці ў адносіны паміж дзьвюма краінамі таксама дадалося ў апошнія дні пасьля сэрыі расейскіх бамбаваньняў, што, па паведамленьнях Анкары, былі арыентаваныя на вёскі сырыйскай турэцкамоўнай меншасьці. У мінулую пятніцу турэцкія ўлады нават выклікалі для тлумачэньняў расейскага амбасадара, якога прадстаўнікі Анкары папярэдзілі пра тое, што падобныя дзеяньні яго дзяржавы будуць мець «сур’ёзныя наступствы».

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG