Лінкі ўнівэрсальнага доступу

Беларусь будзе здабываць золата ў Зымбабвэ

абноўлена

Прэзыдэнт Зымбабвэ Робэрт Мугабэ

Адну з найбяднейшых краінаў сьвету, якой ужо 35 год кіруе дыктатар, наведаў Віктар Шэйман.

Падчас візыту кіраўніка спраў прэзыдэнта Віктара Шэймана ў Зымбабвэ быў падпісаны шэраг кантрактаў, паведамляюць мясцовыя СМІ, называючы чыноўніка «генэралам».

Шэйман вёў перамовы з 91-гадовым кіраўніком краіны Робэртам Мугабэ за зачыненымі дзьвярыма. Вядома, што ён перадаў Мугабэ запрашэньне наведаць Беларусь у красавіку 2016 году, абмеркаваў пытаньні энэргетыкі, будаўніцтва дамоў, дарог і мастоў, навучаньня зымбабвійцаў у Беларусі.

Акрамя таго, падчас візыту быў падпісаны кантракт на стварэньне супольнага беларуска-зымбабвійскага прадпрыемства па здабычы золата. Беларусь будзе пастаўляць шахтнае абсталяваньне і забясьпечваць асваеньне ўчастку здабычы.

Візыт зымбабвійскага боку ў Беларусь прайшоў у чэрвені. Тады віцэ-прэзыдэнт Зымбабвэ Эмэрсан Мнангагва анансаваў кантракт на 150 млн даляраў на закуп тэхнікі, вырабленай на заводах МАЗ, МТЗ, БелАЗ і «Амкадор».

Зымбабвэ — адна з найбяднейшых краінаў сьвету. Па такіх парамэтрах, як ВУП на душу насельніцтва або індэкс разьвіцьця чалавечага патэнцыялу, яна трывала займае ў сьпісах краін сьвету адно з апошніх месцаў. У 2000-х краіна перажыла гіпэрінфляцыю, якая ў 2008-м дасягнула рэкордных тэмпаў — 231 150 888% на год. У 2009-м краіна адмовілася ад нацыянальнай валюты. З 1980 году краінай нязьменна кіруе Робэрт Мугабэ, якога часта абвінавачваюць у парушэньні правоў чалавека, карупцыі, расізьме і іншых палітычных і эканамічных злачынствах.

Тым ня менш нядаўняе дасьледаваньне Standard &Poor’s паказала, што зымбабвійцы перагналі беларусаў па ўзроўні фінансавай пісьменнасьці: у Беларусі 38% дарослых змаглі добра адказаць на пытаньні пра інфляцыю, фінансавыя рызыкі і адсоткавыя стаўкі, у Зымбабвэ — 41%.

______________________________________

Паводле кіраўніка аналітычнага цэнтру «Стратэгія» Леаніда Заікі, рашэньне пра партнэрства з Зымбабвэ абумоўленае закрытасьцю для Беларусі іншых рынкаў і жаданьнем весьці незалежную ад Расеі палітыку.

Леанід Заіка ня лічыць, што падобныя рашэньні пра партнэрства абгрунтаваныя эканамічна, але ня бачыць нічога дзіўнага ў тым, што Беларусь гандлюе з адной з найбяднейшых краінаў сьвету.

Леанід Заіка
Леанід Заіка

«Ніхто ніколі не казаў, што Беларусь — багатая краіна. Яна па структуры эканомікі як Альжыр, па ўзроўні ВУП на душу насельніцтва як Калюмбія. А нашы продажы тэхнікі на расейскім рынку церпяць крах. Цяпер мы ў Расею на 36% зьнізілі экспарт! І песьня ў такой сытуацыі — „Ратуйся хто можа, шукайце новыя рынкі“. Дзе мы яшчэ патрэбныя? Лукашэнка ж неяк сказаў: „Ідзіце туды, дзе нас ня ведаюць“.

Беларусь, як мне здаецца, можа стварыць стратэгічнае партнэрства Зымбабвэ-Беларусь. Калі раней, 15 год таму, былі міты пра стварэньне партнэрства Беларусь-Кітай, дык цяпер больш рэалістычна разьвіваць адносіны з Зымбабвэ. А што бедная краіна — дык мы таксама бедныя, што паробіш!

А што тычыцца фінансавай устойлівасьці, надзейнасьці партнэраў... Мугабэ быў сацыяліст у маладосьці, Лукашэнка таксама сацыяліст. Што я магу сказаць, калі ім падабаецца на вуліцы Карла Маркса гандляваць з Зымбабвэ! Я ж не скажу — гандляваць са Швэцыяй, нікому мы ў Швэцыі не патрэбныя. Усе гэтыя пытаньні выбару, дзе і якія напрамкі разьвіваць, — гэта палітычныя рашэньні, эканамічнага нічога тут няма.

Калі нас не пускаюць ні на якія зьнешнія рынкі, калі мы зрабілі выгляд, што з Расеяй паводзім сябе сувэрэнна і самастойна і можам паводзіць сябе сувэрэнна і самастойна, то — „Даеш Зымбабвэ!“. Назва краіны прыгожая, загараць можна, можна зь дзецьмі зьезьдзіць вы ведаеце каму...»

Глядзець камэнтары (3)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG