Мікола Статкевіч, які цяпер за мяжой, пра чарговы штраф, гэтым разам за акцыю ля будынку КДБ, даведаўся ад карэспандэнта Свабоды.
Міколу Статкевіча судзіла завочна і пакарала штрафам у 9 мільёнаў рублёў судзьдзя Вайтэховіч, якая значыцца ў эўрапейскім санкцыйным сьпісе.
Санкцыі цяпер замарожаныя, але гэта ніяк не паўплывала на вырак судзьдзі Вайтэховіч, заўважыў Мікола Статкевіч:
«Ніякіх зьменаў я і не чакаў. Бо судзьдзяў у нас няма, судзіць адзін чалавек, мэта якога — напалохаць нас перад наступнай акцыяй, якая адбудзецца 24 лістапада. 24 лістапада 1996 году, калі адбыўся рэфэрэндум, Беларусь ступіла на нецывілізаваны шлях, і мы мусім з гэтым змагацца, каб вярнуць Беларусь да дэмакратыі. Грамадзтва ў нас надзвычай запалоханае, але ўсё роўна людзі прыходзяць на акцыі. Гэта героі, бо яны пераадольваюць страх. Новая акцыя адбудзецца ў прызначаным фармаце — спачатку зьбяромся каля ГУМу, потым пойдзем да ўваходу ў МУС, а адтуль да Цэнтравыбаркаму. Мы ўскладзем кветкі і запалім зьнічкі ў памяць пра Юрыя Захаранку, Віктара Ганчара, Анатоля Красоўскага, Зьмітра Завадзкага. Трэба памятаць нашых герояў, якія аддалі жыцьці ў змаганьні з дыктатурай».
Мікалай Статкевіч дадаў, што позву ў суд яму і гэтым разам так і не даслалі. Адвакату Статкевіча ў Менскім гарадзкім судзе паведамілі, што палітыка выклікалі ў суд праз СМС. Між тым Статкевіч кажа, што такіх паведамленьняў не атрымліваў.