Улады Эгіпту пагадзіліся прыняць дапамогу амэрыканскага Фэдэральнага бюро расьсьледаваньняў (ФБР) для высьвятленьня прычынаў крушэньня самалёта А321 расейскай кампаніі «Кагалымавія» над Сінайскім паўвостравам.
«Мы атрымалі ад амэрыканцаў прапановы паўдзельнічаць у расьсьледаваньні ў складзе сьледчай групы і іх неадкладна ўхвалілі», — сказаў міністар замежных спраў Эгіпту Самех Шукры ў інтэрвію тэлеканалу CNN.
Як паведамляе расейская служба навінаў BBC, адной з прычынаў згоды, паводле словаў Шукры, стала тое, што амэрыканская кампанія Pratt & Whitney займаецца вытворчасьцю рухавікоў, якія ўсталёўваюць на самалётах Airbus.
Раней прадстаўнік ФБР Джош Кэмпбэл паведаміў журналістам, што Фэдэральнае бюро расьсьледаваньняў прапанавала Расеі і Эгіпту дапамогу крыміналістаў у расьсьледаваньні катастрофы А321. Пры гэтым амэрыканскія СМІ паведамлялі, што ўрады Расеі і Эгіпта адмовіліся ад дапамогі.
Раней BBC высьветліла, што Эгіпет пачаў уласнае расьсьледаваньне вэрсіі, паводле якой прычынай катастрофы лайнэра было закладзенае ў яго выбуховае прыстасаваньне.
Лайнэр Airbus 321 расейскай кампаніі «Кагалымавія» (Metrojet), які вылецеў 31 кастрычніка з Шарм-эш-Шэйха ў Санкт-Пецярбург, упаў неўзабаве пасьля ўзьлёту, прычым да моманту абрыву запісаў «чорных скрыняў» і сувязі з самалётам экіпаж не паведамляў ні пра якія непаладкі. Сінайскае падразьдзяленьне экстрэмісцкай арганізацыі «Ісламская дзяржава» двойчы брала на сябе адказнасьць за гэтую катастрофу.
