Лінкі ўнівэрсальнага доступу

Усерасейскую фэдэрацыю лёгкай атлетыкі рэкамэндавана дыскваліфікаваць за допінг


Усясьветнае антыдопінгавае агенцтва (WADA) афіцыйна рэкамэндавала дыскваліфікаваць Усерасейскую фэдэрацыю лёгкай атлетыкі (ВФЛА) і адхіліць яе спартоўцаў ад удзелу ў спаборніцтвах да завяршэньня расьследаваньня, якое вядзецца спэцыяльнай Незалежнай камісіяй агенцтва.

Сёньня ў Жэнэве адбылася прэс-канфэрэнцыя Сусьветнага антыдопінгавага агенцтва ў сувязі з прадстаўленьнем яе справаздачы Міжнароднаму алімпійскаму камітэту.

Камісія рэкамэндавала неадкладна абвясьціць Усерасейскую фэдэрацыю лёгкай атлетыкі структурай, якая «не выконвае» міжнародны антыдопінгавы кодэкс. Міжнароднай фэдэрацыі лёгкай атлетыкі рэкамэндавана дыскваліфікаваць расейскую фэдэрацыю і забараніць яе спартоўцам ўдзел ва ўсіх спаборніцтвах.

Камісія Усясьветнага антыдопінгавага агенцтва патрабуе пажыцьцёвай дыскваліфікацыі Марыі Савінавай, алімпійскай чэмпіёнкі 2012 года, і Кацярыны Паістагавай, якая на гульнях у Лёндане атрымала бронзавы мэдаль.

У справаздачы камісіі адзначаецца, што дырэктар антыдопінгавай лябараторыі ў Маскве Рыгор Родчанкаў зьнішчыў больш за 1400 допінг-пробаў — за тры дні да прыбыцьця ў Маскву членаў адмысловай камісіі летась у сьнежні. Зьнішчаныя пробы павінны былі прайсьці паўторнае тэставаньне ў іншых лябараторыях.

«Магчыма, мы маем справу з спадчынай савецкай сыстэмы», — сказаў на прэсавай канфэрэнцыі ў Жэнэве кіраўнік Незалежнай камісіі Рычард Паўнд. Паводле яго слоў, ёсьць падозраньні, што ў Расеі дзейнічае допінгавая праграма, якая падтрымліваецца дзяржавай. Паўнд, лічыць, што міністар спорту Віталь Мутко ня мог ня ведаць аб тым, што адбываецца.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG