Лінкі ўнівэрсальнага доступу

Ужо сёньня, 4 лістапада: Прэзэнтацыя кнігі Адама Глобуса «Гісторыі пра Менск і ваколіцы»


Бліц-агляд падзеяў і тэмаў у Беларусі, сьвеце, гісторыі.

Афіша

Менск. У Літаратурным музэі Петруся Броўкі ў рамках праекту «Сустрэча з аўтарам» адбудзецца прэзэнтацыя кнігі Адама Глобуса «Гісторыі пра Менск і ваколіцы». Запрошаны госьць — актор і рэжысёр Беларускага радыё Алег Вінярскі. Уваход вольны. Пачатак у 19.00.

Менгарвыканкам праводзіць грамадзкія абмеркаваньні горадабудаўнічага праекту: Генэральны плян Менску (карэктаваньне). Азнаёміцца з праектам і пакінуць заўвагі і прапановы можна з панядзелка па пятніцу — з 14.00 да 18.00, у суботу і нядзелю — з 10.00 па 15.00) у будынку «Менскграда» (вул. Камсамольская, 8, 2 паверх, каб. 204).

Менск. Напярэдадні 22-га кінафэстывалю «Лістапад» конкурсная пляцоўка фэстывалю кінатэатар «Піянэр» запускае мініфэстываль «Іншая анімацыя» — недзіцячыя мультфільмы ў жанрах ад хорару да нуара.

У Рэспубліканскай мастацкай галерэі Беларускага саюза мастакоў (Палац мастацтва, вул. Казлова, 3) адбудзецца адкрыцьцё выставы «Варыяцыі Існасьці», на якой будуць экспанавацца жывапісныя і графічныя работы, скульптура, а таксама творы дэкаратыўна-прыкладнога мастацтва: кераміка, батык, прадстаўленыя сябрамі Магілёўскай і Бабруйскай арганізацый Беларускага саюза мастакоў.

Гэты дзень у гісторыі

1661 — у бітве пад Кушлікамі войска Рэчы Паспалітай атрымала перамогу над войскамі Маскоўскай дзяржавы.

1863 — расейскія карнікі схапілі паўстанцкага камісара Менскай губэрні Міхала Аскерку. Ён быў расстраляны, нягледзячы на тое, што родныя і сябры здолелі атрымаць ад Мураўёва дакумэнты пра зьмякчэньне прысуду. Але паведамленьне пра скасаваньне сьмяротнага пакараньня было накіравана ў Магілёў у вечар пасьля экзэкуцыі. Гэты эпізод апісаны Ўладзімерам Караткевічам у рамане «Нельга забыць».

1924 — у Віцебску адкрыўся вэтэрынарны інстытут.

1956 — савецкія войскі правялі апэрацыю «Віхар» для падаўленьня вугорскай рэвалюцыі. Адным зь ініцыятараў сілавога ўмяшальніцтва быў тагачасны амбасадар СССР у Вугоршчыне Юры Андропаў.

У гэты дзень нарадзіліся:

1887 — Зьміцер Жылуновіч (Цішка Гартны) — беларускі пісьменьнік і дзяржаўны дзяяч.

1929 — Сяргей Карніловіч, дзяяч беларускай эміграцыі.

1940 — Яўген Гучок, беларускі паэт.

У гэты дзень памерлі:

1937 — расстраляны Аляксандар Вальковіч, дзяяч БНР, народны сакратар фінансаў БНР. У 1920 годзе эміграваў, у 1925 — вярнуўся ў БССР. У 1937-м асуджаны за «антысавецкую агітацыю і прапаганду» да вышэйшай меры пакараньня.

1937 — расстраляныя беларускі мастак Хрыстафор Даркевіч і ягоны брат, мастацтвазнаўца Пятро Даркевіч.

1995 — забіты Іцхак Рабін, прэм’ер-міністар Ізраілю, ляўрэат Нобэлеўскай прэміі міру.

Цытата на памяць:

«Жыцьцё мае гэткую сілу, гэткае лякарства, што яно заўсёды вылечвае ад застарэўшае хваробы... Мы павінны спадзявацца, што ўжо не за гарамі тая пара, калі і наша Беларусь стане на той самай ступені разьвіцьця, на якой стаяць і суседнія старонкі, да якога падняліся і братнія нам народы — славяне, як украінцы, чэхі, велікарусы, палякі і др.; што скора зьявіцца і к нам цёплая жывіцельная вясна, прыедзе вясёлай, маладой, на сьветлым, белым кані — адраджэньні — і разам растопіць халодны лёд, што аблёг шчыльна змучанае цела нашае родзіны. Беларусь прачнецца і зажыве, як другія народы і староны, — новая, свежая, маладая! Эх, праўда! Ці ж не чуваць, як ужо пяе першы жаваранак ідучага адраджэньня?! Ці ж не заметны пучкі сьвету, што падаюць на смуглы твар нашае Беларусі?..»

Цішка Гартны

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG