Лінкі ўнівэрсальнага доступу

«Колькі можна ў застоі знаходзіцца? З 1991 году нічога ня робіцца»,— апытаньне ў Менску


Ці патрэбны Беларусі эканамічныя рэформы, разважаюць мінакі на вуліцах Менску.

Наўпроставы лінк

Спадар сярэдніх гадоў, праграміст: «Рэформы патрэбныя для любой краіны, асабліва для Беларусі. Цягам апошніх дваццаці гадоў ніякіх рэформаў не адбывалася. У параўнаньні з Польшчай ці Літвой — нічога не праводзілася. Таму і праблемы ў эканоміцы такія».

Маладая пэнсіянэрка: «Канечне, так, патрэбныя. Бо народ наш цярпіць нястачы. Цярпіць нястачы негалосна — многія ня маюць працы. А калі маюць, то неабходна абавязкова шукаць некалькі працаў, бо нашая праца не ацэненая годна. І, каб у людзей зьзялі вочы, неабходна, каб чалавек адчуваў, што яго цэняць».

Спадар сярэдніх гадоў, беспрацоўны па стане здароўя: «Так, колькі можна ў гэтым застоі знаходзіцца? З 1991 году нічога ж ня робіцца, толькі павярхоўна. А глыбей капнуць — усё надзьмута танным расейскім газам. Зьнешне нібыта ўсё добра, але ж гэтая бурбалка некалі лопне».

Былы інжынэр: «Так, так, бо гэтак ня можа доўжыцца вечна: эканоміка старая, і яна перастае працаваць. Беларусь яшчэ індустрыяльная краіна, а ўвесь сьвет жыве ў пасьляіндустрыяльнай прасторы. Дзе галоўнае — не вырабляць, а што вырабляць. Вырабляць не складана — гэта і робаты могуць рабіць. Галоўнае — што рабіць. А мы ўсё рухаемся па інэрцыі. Інэрцыя вычарпальная, і гэтае кола ў выніку спыніцца ўрэшце».

Спадар сярэдніх гадоў: «Канечне, патрэбныя, але найперш палітычныя. Бо без палітычных рэформаў ня будзе і эканамічных — гэта ж усім зразумела. Перадусім трэба больш свабоды прыватнаму бізнэсу. Менш кантролю з боку розных дзяржаўных органаў. Скарачэньне чынавенскага апарату і міліцэйскага — гэта самае галоўнае, напэўна».

Юначка: «Гледзячы што ўважаць за рэформы. Натуральна, што тая сытуацыя, якая ёсьць — яна ня можа задавальняць. Бо ўлада і дзяржава імкнецца ўсімі магчымымі спосабамі сабраць сродкі, у тым ліку ўводзячы „падаткі на падаткі“ — маю на ўвазе падатак на дармаедзтва. Зьнешнія крэдыты не вырашаюць пытаньняў, і, зразумела, нешта трэба рабіць. Трэба больш працаваць зь дзяржаўнымі прадпрыемствамі, якія цяпер ня робяць унёску ў агульную эканоміку дзяржавы. Важна наладжваць сувязі зь іншымі краінамі адносна экспарту-імпарту і гэткім чынам падтрымліваць эканоміку краіны, а ня коштам грамадзян, якія і так ня маюць дастатку».

Юнак: «Рэформы патрэбныя адназначна, бо наша эканоміка фактычна не існуе. Мы прывязаныя да Расеі, мы залежым ад Расеі, мы не глядзім у іншы бок, а толькі ў той бок, куды глядзіць „вялікі брат“. Таму, калі ў Расеі цяпер крызіс, то гэты крызіс адчувальны цяпер і ў нас. Насамрэч у нас эканомікі ніякай і не было, бо мы даўно ўжо ўсё прадалі, прадаліся і папросту ляжым пад „вялікім братам“. Таму пра якую эканоміку гаворка, калі яе няма?»

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG