Лінкі ўнівэрсальнага доступу

Памёр акадэмік Мікалай Барысевіч


Вядомы беларускі навуковец, акадэмік Мікалай Барысевіч памёр 25 кастрычніка ў Менску на 93-м годзе жыцьця, паведамілі ў прэс-службе Нацыянальнай акадэміі навук Беларусі.

Разьвітаньне зь ім пройдзе 28 кастрычніка ў 11.00 у будынку прэзыдыума НАН Беларусі. Грамадзянская паніхіда пачнецца ў 12.30.

Мікалай Аляксандравіч Барысевіч нарадзіўся 21 верасьня 1923 года ў пасёлку Лучны Мост (Менская вобласьць). Ваяваў падчас Вялікай Айчыннай вайны, спачатку як падпольшчык і партызан, а з 1944 года быў артылерыстам рэгулярнай арміі, дайшоў да Бэрліна. Узнагароджаны двума ордэнамі Чырвонай Зоркі, ордэнамі Айчыннай вайны першай і другой ступені, мэдалямі.

У 1950 годзе Мікалай Барысевіч скончыў БДУ. Пасьля вучобы быў залічаны ў штат Акадэміі навук БССР, працаваў у галіне оптыкі і спэктраскапіі, лазэрнай фізыкі і інфрачырвонай тэхнікі. У 1969–1987 гадах узначальваў АН БССР.

«З яго імем зьвязана бурнае разьвіцьцё ў БССР фізыкі, матэматыкі, інфарматыкі, хіміі, навук пра Зямлю, фотабіялёгіі і іншых навук, — адзначылі ў прэс-службе НАН Беларусі. — Ён быў ініцыятарам стварэньня ў АН БССР канструктарскіх бюро, досьледна-прамысловых вытворчасьцяў, рэгіянальных навуковых цэнтраў, разьвіцьця работ па абароннай тэматыцы. Пад кіраўніцтвам Мікалая Аляксандравіча Барысевіча АН БССР стала адной з найлепшых акадэмій Савецкага Саюза, вучоныя БССР па шэрагу найважнейшых навуковых кірункаў занялі вядучыя пазыцыі ў сьвеце».

Аўтарству Барысевіча належыць адкрыцьцё эфэкту «стабілізацыі-лабілізацыі электронна-ўзбуджаных малекул пабочнымі газамі», а таксама больш як 600 навуковых працаў.

За навуковую дзейнасьць Мікалая Барысевіча ў 1978 годзе ўганаравалі званьнем Героя Сацыялістычнай Працы з уручэньнем ордэна Леніна і залатога мэдаля «Серп і молат». У розныя гады яго ўзнагароджвалі Ленінскай прэміяй, Дзяржаўнымі прэміямі СССР і Рэспублікі Беларусь, ордэнам Працоўнага Чырвонага Сьцяга, ордэнам Кастрычніцкай Рэвалюцыі, трыма ордэнамі Леніна, ордэнам Дружбы (Расія), ордэнам Францыска Скарыны.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG