Раздача яблыкаў ад БРСМ, бяспройгрышная лятарэя ад «Гомельхлебпрама», замеры лекарамі ціску ды вагі, канцэрты і спартовыя спаборніцтвы — чым завабліваюць гамельчукоў на выбарчыя ўчасткі?
У Гомелі на кожным кроку чуваць, што на сёлетніх прэзыдэнцкіх выбарах яўка грамадзянаў на ўчасткі становіцца асноўнай праблемай для ўлады і падкантрольных ёй выбарчых камісіяў.
У грамадзкім транспарце круцяць адмысловыя запісы пра датэрміновае і асноўнае галасаваньне 11 кастрычніка, папярэджваючы: «Важны голас кожнага». Чатыры хвалі афіцыйных улётак пра выбары накрылі паштовыя скрыні гамельчукоў. Апошняя — у выглядзе каляровай паштоўкі са здымкамі Аляксандра Лукашэнкі ў атачэньні маладых дзяўчат, параду вэтэранаў, школьнікаў, спартоўцаў, вайскоўца з афіцыйным чырвона-зялёным сьцягам у руках і надпісам на беларускай мове: «За будучыню незалежнай Беларусі!». На адваротным баку паштоўкі-каляжу ўжо па-расейску напісана: «Разам мы стварылі незалежную Беларусь! Разам мы пераадолеем любыя нягоды! Разам мы пабудуем шчасьлівую і квітнеючую краіну! Мы разам!» І факсымільны подпіс: «Ал. Лукашэнка».
А днямі на вуліцах Валатаўской, Садовай, Пушкіна на дзьвярах пад’ездаў жылых дамоў, на сьценах і нават вадасьцёкавых трубах зьявілася размножаная праграма мерапрыемстваў 11 кастрычніка на ўчастку для галасаваньня № 17. Чаго тут толькі няма! Бяспройгрышная лятарэя ад «Гомельхлебпрама», раздача яблыкаў актывістамі БРСМ, замер вагі, артэрыяльнага ціску і кансультацыя лекара, кансультацыі дзіцячага псыхоляга, спэцыялістаў ЖКГ, Белдзяржстраху, «Беларусбанку», а яшчэ выставы, канцэрты, спартовыя спаборніцтвы і нават падпіска на пэрыядычныя выданьні. Выбірай — ня выбераш.
Карэнная гараджанка, якая назвалася Валянцінай, гэтак рэагуе на ініцыятыву ўладаў наконт бяспройгрышнай лятарэі ды раздачы яблыкаў на выбарчых участках:
«Завабліваюць на выбары — пірожныя будуць бясплатна раздаваць ад „хлебпрама“, яблыкі. Лепей ужо, як ва Ўкраіне — Януковіч грэчку раздаваў, дык у гаспадарцы б спатрэбілася. Лічу, што на выбары наагул ісьці бессэнсоўна. Бо кожны раз, калі праводзіцца такая выбарчая кампанія, вынік адзін і той жа. Дык які сэнс хадзіць на такія выбары? Хіба толькі па дармовыя пірожныя».
У сваю чаргу спадарыня Тацяна з вуліцы Валатаўской лічыць, што любы жэст у бок выбарцаў — гэта своеасаблівы падарунак:
«Ведаеце, для нашых людзей і гэта будзе нейкім падаркам. Таму я ня супраць. І няхай ціск мераюць, бо ў нас бясплатнай мэдыцыны, па-мойму, ніколі не было. І я вельмі зьдзіўлена, што ў нас ёсьць такія добрыя пэнсіянэры, якія хочуць быць прэзыдэнтамі».
