Лінкі ўнівэрсальнага доступу

Дзятлава рыхтуецца да «Дажынак»: райвыканкам адбудоўваюць, палац Радзівілаў прадаюць


Пасьля рэканструкцыі будынак райвыканкаму ў Дзятлаве пашыраецца ці ня ў два разы
Пасьля рэканструкцыі будынак райвыканкаму ў Дзятлаве пашыраецца ці ня ў два разы

У райцэнтры Дзятлава вядуць маштабную рэканструкцыю гарадзкога цэнтру да абласных «Дажынак». Дзятлаўцы зьдзіўляюцца, навошта дабудавалі і так вялікі райвыканкам і чаму не рэстаўруюць, а прадаюць былы палац Радзівілаў.

У райцэнтры Дзятлава Гарадзенскай вобласьці вядуць маштабную рэканструкцыю гарадзкога цэнтру да абласных «Дажынак», прызначаных на 13 лістапада. Дзятлаўцы зьдзіўляюцца, навошта дабудавалі і так вялікі райвыканкам і чаму не рэстаўруюць, а прадаюць былы палац Радзівілаў.

Нават старэйшыя жыхары Дзятлава ня памятаюць такой маштабнай рэканструкцыі гораду. Кажуць, што ў раёне на такую будоўлю ніколі не было грошай. Аб’ектаў рэканструкцыі і праўда шмат, у горадзе поўна будаўнічай тэхнікі, рабочых.

Рэканструкцыя ў цэнтры Дзятлава
Рэканструкцыя ў цэнтры Дзятлава

Асабліва ўсіх гараджан уражвае рэканструкцыя райвыканкаму, будынак якога пабольшае ці ня ў два разы. Але ў той самы час зьменяць выгляд і раённы Дом культуры, і гатэль «Ліпічанка». Рамантуюцца мост на вуліцы Міцкевіча, інтэрнат і некалькі дамоў па вуліцах Савецкай і Фрунзэ, аб’екты гандлю, дарогі і іншае.

​Толькі былы палац Радзівілаў сярэдзіны ХVІІІ стагодзьдзя, што побач з раённым шпіталем, сіратліва стаіць некрануты, абшарпаны, з абсыпанай ад часу сьцяной з зачыненымі дзьвярыма, і ў акне аб’ява: прадаецца. Усе, з кім давялося пагутарыць у Дзятлаве, не прамінулі згадаць пра гэта.

Палац Радзівілаў, выгляд з тыльнага боку
Палац Радзівілаў, выгляд з тыльнага боку

Разгаварыўся з маладой жанчынай у цэнтры гарадка. Яна даволі крытычна глядзіць на тое, што рэканструкцыя адбываецца ў кароткія тэрміны: гэта, паводле яе, ня зможа не адбіцца на якасьці.

— Цэнтар гораду ў нас зроблены больш-менш нармальна, але калі паглядзець далей, то там усё страшна. Але самае страшнае ў нас — гэта дарогі. Іх робяць толькі для зьнешнасьці, а праз гады 2–3 яны разваляцца, бо іх робяць на хуткую руку. Лепш бы яны зрабілі добрыя дарогі, а дамы дзе-нідзе проста падфарбавалі.

Асобна спадарыня кажа пра райвыканкам. Яна наагул не разумее, навошта іхняму маленькаму гораду такія гмахі для ўлады.

Пасьля рэканструкцыі будынак райвыканкаму ў Дзятлаве пашыраецца ці ня ў два разы
Пасьля рэканструкцыі будынак райвыканкаму ў Дзятлаве пашыраецца ці ня ў два разы

— Ня ведаю, навошта гэта. Я была адзін раз у старым будынку, і лічу, што таго было дастаткова. Лепей бы зрабілі за гэтыя грошы дзіцячы садок, школу ці адрэстаўравалі палац Радзівілаў. Ён вельмі прыгожы. І калі замежныя госьці наведваюцца ў Дзятлава, то ім ён чамусьці найбольш цікавы. І калі ў інтэрнэце ў пошук уводзяць — Дзятлава, то найперш зьяўляецца палац Радзівілаў і «Радон». Гэта самыя два такія месцы, дзе можна нешта паказаць і распавесьці пра тое, што ўяўляе сабой наш горад. Вядома, добра, што горад становіцца прыгажэйшым і ня сорамна сюды будзе гасьцей запрасіць. Толькі як гэта ўсё доўга пратрымаецца..."

Цэнтар гораду ў Дзятлаве
Цэнтар гораду ў Дзятлаве

Разгаварыўся з мужчынам пэнсійнага веку, які пражыў тут большую частку жыцьця. Кажа, што яму прыемна, што ягонае Дзятлава становіцца прыгажэйшым, але, паводле яго, ня ўсё ў жыцьці мераецца зьнешняй прыгажосьцю:

— Але справа ў у тым, што першачаргова трэба было зрабіць. Для жыхароў Дзятлава сёньня вялікая праблема — ачышчальныя збудаваньні масласырзаводу. Яны ўжо ператэрмінаваныя, іх даўно ніхто ня чысьціў, і ў гэта сьпякотнае лета з-за іх немагчыма было дыхаць, людзі задыхаліся, скардзіліся. Райвыканкам нічога не зрабіў, каб палепшыць экалягічную сытуацыю. А замест гэтага будуецца цудоўны, прыгожы будынак райвыканкаму. Будынак добры, ён застанецца, і архітэктура прыгожая, але хто ім будзе карыстацца...

Цэнтар гораду ў Дзятлаве
Цэнтар гораду ў Дзятлаве

Яшчэ спадар зьвяртае ўвагу на тое, што жыхары Дзятлава наагул не інфармаваныя пра тое, адкуль узяліся грошы на рэканструкцыю, колькі і хто іх выдзеліў. Па горадзе ходзяць толькі чуткі. І раённая газэта нічога пра гэта не напісала.

Не забыўся суразмоўца ўзгадаць і пра найбольш каштоўны помнік архітэктуры ў горадзе — палац Радзівілаў, які ня трапіў пад рэканструкцыю і на які ніхто ня выдзеліў ні капейкі грошай.

Палац Радзівілаў, выгляд з тыльнага боку
Палац Радзівілаў, выгляд з тыльнага боку

Іншы мужчына пэнсійнага веку таксама кажа, што горад зьменіцца ў лепшы бок, але, маўляў, павінна быць усё ж першачарговасьць, калі трацяцца бюджэтныя грошы. Паводле яго, службы райвыканкаму можна было разьмясьціць у іншых пустых будынках — да прыкладу, той жа школы- інтэрнату, а грошы пусьціць на іншае.

— Трэба, каб хоць нейкая прамысловасьць у нас разьвівалася. У нас жа няма нічога, і моладзь тут не затрымліваецца. Усе зьяжджаюць. Вядома ж, у калгасе шмат не заробіш.

Пры нагодзе пацікавіўся ў спадароў — ці адчуваюць у Дзятлаве выбарчую кампанію, ці прыяжджалі кандыдаты на прэзыдэнта? Мне ў адказ толькі пасьмяяліся.

— Нічога наагул не чуваць, ніхто не прыяжджаў, не зьбіраўся, ніякіх сходаў не было, нічога не чуваць абсалютна...

Цэнтар гораду ў Дзятлаве
Цэнтар гораду ў Дзятлаве

Наступны мой суразмоўца аказаўся музэйным работнікам. У яго свой погляд на рэканструкцыю ў Дзятлаве.

— З аднаго боку, Дзятлава будзе прыгажэйшым, і ў гэтым няма сумненьняў. Але, з другога боку, я як работнік культуры падтрымліваю артыкул спадара Трусава, у якім ён напісаў, што без культуры ў нас ня зрушыцца зь месца і эканоміка, і ўсё астатняе. І бачу, што ў музэі ў нас таксама нічога ня робіцца, хоць праблемаў ёсьць шмат і наш палац Радзівілаў самотна стаіць. Разумею, што зь ім цяжэй, бо гэта помнік архітэктуры і не адразу ўсё зробіш. Але ўзгадваецца былы начальнік санэпідэмстанцыі, які правёў рэканструкцыю адной сьценкі з усімі пілястрамі і іншымі дэталямі — яна стаіць ужо 10 гадоў, і ўсё акуратна.

Шыльда і абвестка на палацы Радзівілаў
Шыльда і абвестка на палацы Радзівілаў

Палац Радзівілаў у Дзятлаве цяпер належыць раённаму шпіталю. Палац двухпавярховы, агульная плошча больш за 1.5 тыс. квадратных мэтраў, мае ўсе інжынэрныя камунікацыі. Помнік архітэктуры аднесены да другой катэгорыі, а таму інвэстару прапануюць набыць яго на ўмовах падпісаньня ахоўных абавязкаў. Пачатковы кошт на таргах складаў блізу двух мільярдаў беларускіх рублёў, але пакупнікоў пакуль няма.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG