Новае фота кожны дзень, увесь год. Загружайце сюды свае здымкі гарадзкіх і прыродных краявідаў, падзеяў і зьяваў жыцьця ў 2015 альбо на пошту radiosvaboda@gmail.com. Пажадана дасылаць фота ў прапорцыі 16 на 9.
Афіша
У Менску —сьвята гораду і паўмаратон (старт удзельнікаў аб 11-й ад Палацу спорту), а таксама карацейшыя забегі, у тым ліку для дзяцей. У сувязі з гэтым будзе зьменены рух наземнага транспарту ў цэнтры.
Гастранамічная сьвята для аматараў беларускай кухні пройдзе ў менскім Парку Чалюскінцаў ад 12 да 18-й. Не абыйдзецца без дранікаў.
На бульвары Мулявіна у рамках Дня гораду зьявіцца "вязаны клён«і іншыя падобныя аб’екты. Цэнтр сучасных мастацтваў і творчы клюб Zabombi. byабяцаюць паказаць, як выглядае «вязанае графіці».
У Вілейцы —"Тутэйшы квэст" — спаборніцтва для кемлівых. Удзельнікам трэба будзе (абыходзячы горад пешшу ці едучы на ровары) знайсьці адказы на пытаньні, якія тычацца славутасьцяў, гісторыі, сучасных традыцый і цікавых людзей Вілейкі. Запрашаюцца бацькі зь дзецьмі і ўсе ахвотныя. Пачатак у 11 у Вілейскім дзяржаўным каледжы (вул. Гагарына, 4).
У гісторыі
1562 — Князі і баяры ВКЛ на палявым (абозным) сойме каля Віцебску ўхвалілі прапанову аб новай дзяржаўнай уніі з Польшчай і накіравалі яе вялікаму князю.
1769 — Расейскія войскі пад камандаваньнем Аляксандра Суворава перамаглі атрады Барскіх канфэдэратаў на чале з Казiмiрам i Францам Пуласкiмі ля вёскі Арэхава (паблізу Маларыты).
1501 — Мікелянджэла пачаў працаваць над Давідам.
1953 — Мікіта Хрушчоў абраны першым сакратаром ЦК КПСС.
1994 — Дзяржаўная камісія па артаграфіі, створаная ў Беларусі, апублікавала выніковыя рэкамэндацыі, у якіх прызнавалася пажаданасьць вяртаньня некаторых дарэформенных нормаў беларускай мовы.
1974 — Беларуская студыя тэлебачаньня пачала трансьляваць каляровыя перадачы.
2013 — Аляксандр Лукашэнка стаў ляўрэатам «Шнобелеўскай прэміі міру» за забарону воплескаў у 2011-м. Парадыйная прэмія ўручаецца ў Гарвардзкім унівэрсытэце ЗША.
У гэты дзень нарадзіліся:
1893 — Андрэй Мрый, беларускі празаік, журналіст. Напісаў кнігу «Запіскі Самсона Самасуя», у якой у сатырычным тоне паказаў усталяваньне новага ладу у 20-я гады мінулага стагодзьдзя, у тым ліку пачаткі савецкай беларусізацыі. Твор быў абвешчаны пасквілем на савецкую рэчаіснасьць, а аўтара саслалі ў ГУЛАГ.
1958 — Аляксандр Краўцэвіч, беларускі гісторык, аўтар працаў па гісторыі ВКЛ.
У гэты дзень памерлі:
1592 — Мішэль Мантэнь, францускі філёзаф, пісьменьнік, палітычны дзяяч, юрыст.
1859 — Фадзей Булгарын, расейскі пісьменьнік беларускага паходжаньня, журналіст, выдавец газэты.
1983 — Мар’ян Пецюкевіч, беларускі этнограф і грамадзкі дзяяч. У перадваенны час —дырэктар музэя імя Івана Луцкевіча. Быў асуджаны на 25 гадоў і сасланы ў лягер у Варкуту.
2003 — Анатоль Багатыроў, беларускі кампазытар, пэдагог і грамадзкі дзяяч.
Цытата
Парада Самсона Самасуя, героя кнігі Андрэя Мрыя, як ацаніць стан беларусізацыі школы:
Я раіў адказным працаўніком, якія зацікавяцца гэтымі пытаньнямі, уяжджаючы ў вёску, пільную ўвагу зьвяртаць на тое, ці на ўсіх варотах крэйдаю награмзолены вядомыя ўсім непрыстойныя словы і лаянка і ці сустракаецца ў іх «ў» заместа звычайнага. Калі вы атрымаеце станоўчыя вынікі, дык, не марудзячы ні хвіліны, вы, як дасьледчык, маеце права зрабіць вывад: 1) фармальныя навыкі ёсьць (калі можна разабраць, што напісана), 2) усе дзеці ахоплены школай (калі, хоць і рэдка, сустракаецца «ў»).
Андрэй Мрый, «Запіскі Самсона Самасуя».