Як паведамляе карэспандэнт «Украінскай праўды», пратэстоўцы каля Вярхоўнай Радай выкарысталі выбуховыя пакеты і баявую гранату, параненыя некалькі дзесяткаў міліцыянтаў.
Па словах дарадцы кіраўніка МУС Антона Герашчанка, у вайскоўцаў, якія ахоўваюць Вярхоўную Раду, кінулі баявую гранату. «Некалькі вайскоўцаў Нацыянальнай Гвардыі атрымалі цяжкія раненьні. Іх жыцьцё ў небяспецы. МУС ажыцьцяўляе першачарговыя дзеяньні па пошуку і затрыманьні правакатараў» – напіcаў Герашчанка ў Фэйсбуку.
Пад Вярхоўнай Радай сабраліся некалькі тысячаў актывістаў партыяў, якія выступаюць супраць зьменаў у Канстытуцыю.
Прыхільнікі Радыкальнай партыі Ляшка, Усеўкраінскага аб’яднаньня «Свабода» і партыі «Ўкроп» пратэставалі супраць «асаблівага статусу Данбасу», хоць напярэдадні прэзыдэнт Парашэнка тлумачыў, што зьменамі прадугледжаны толькі асаблівы парадак мясцовага самакіраваньня ў межах паўнамоцтваў мясцовых радаў, а ня нейкі асаблівы статус для рэгіёну.
Таксама пад парлямэнтам стаяць прыхільнікі легалізацыі агнястрэльнай зброі для грамадзянаў. Яны скандуюць: «Вольныя людзі маюць зброю!».
