Урад Ізраілю прагаласаваў за бязьвізавы рэжым зь Беларусьсю.

Раней паведамлялася, што міністэрства ўнутраных спраў Ізраілю рэкамэндавала ўраду не зацьвярджаць бязьвізавы рэжым, бо адмена віз можа прывесьці да павелічэньня колькасьці нелегалаў, якія прыбываюць у якасьці турыстаў застаюцца ў Ізраілі з мэтай заробкаў.

Пагадненьне аб адмене візаў падпісалі ў Менску яшчэ 19 верасьня 2014 году. Тады заяўлялася, што новы 2015 год грамадзяне Беларусі і Ізраіля змогуць сустрэць бязь візаў. Аднак гэтага не атрымалася. Пагадненьнем прадугледжана, што з моманту ратыфікацыі і да фізычнай адмены візаў павінна прайсьці 90 дзён. Беларусь свае абавязаньні выканала цалкам 5 студзеня 2015 году. Ізраіль затрымліваецца.

А пакуль, каб беларусу наведаць Ізраіль, трэба набыць візу, якая каштуе 23 даляры. Грамадзянін Ізраіля за беларускую візу мусіць заплаціць даражэй — 60 эўра.