Лінкі ўнівэрсальнага доступу

Калякін у Берасьці: Калі не павялічым тэмпы, то і не зьбяром подпісы


Сяргей Калякін каля помніка тысячагодзьдзю Берасьця
Сяргей Калякін каля помніка тысячагодзьдзю Берасьця

Патэнцыйны кандыдат на прэзыдэнта, лідэр партыі левых «Справядлівы сьвет» Сяргей Калякін наведаў Берасьце, дзе адбываюцца пікеты па зборы подпісаў у яго падтрымку.

Палітык прайшоўся па пікетах, паагітаваў людзей падпісвацца за яго, пагутарыў з рабочымі каля прахадной «Газаапарату».

У інтэрвію Свабодзе Сяргей Калякін распавёў, што перадвыбарчая кампанія, на яго думку, ідзе ня вельмі актыўна:

«Кампанія ідзе досыць цяжка. Тое, што прымеркавалі яе на лета, ускладняе паход па кватэрах. У Менску быў выпадак, калі стокватэрны дом абышлі — і толькі ў трох кватэрах адчынілі. А другое — гэта абыякавасьць людзей да свайго жыцьця і сваёй будучыні. Скажу шчыра, я чакаў крыху іншай рэакцыі. Калі сацыёлягі паказваюць, што сёньня амаль дзьве траціны грамадзян выступаюць за перамены, а яшчэ больш людзей не задавальняе цяперашні стан рэчаў... Думалася, што гэтыя людзі адгукнуцца. На жаль, гэта ня так. І прахадныя заводаў гэта паказалі, што людзі праходзяць, проста мінаючы ўсіх, і не цікавяцца ні ўладамі, ні тымі, хто ў альтэрнатыве ўладзе...»

На пікеце ў падтрымку Сяргея Калякіна
На пікеце ў падтрымку Сяргея Калякіна

Карэспандэнт: «А вы ня думалі, што яны проста баяцца каля прахадной, каб ня страціць сваю працу?»

Берасьцейцы – дзіцяці: «Вось стане дзядзька прэзыдэнтам, а ў цябе ўжо і фота ёсьць»
Берасьцейцы – дзіцяці: «Вось стане дзядзька прэзыдэнтам, а ў цябе ўжо і фота ёсьць»

«Не, яны не баяцца, гэта нейкае такое статкавае пачуцьцё — ідуць усе разам калёнай і не спыняюцца. Некаторыя, праўда, спыняюцца. Зьмена „МАЗа“ калі выходзіць, то з 3–4 тысяч чалавек мы пяцьдзясят подпісаў атрымліваем. На мой погляд, гэта кажа пра тое, што людзі проста не разумеюць, што паўплываць на сваё жыцьцё можна толькі праз інстытут выбараў».

Выбаршчык гутарыць з патэнцыйным кандыдатам
Выбаршчык гутарыць з патэнцыйным кандыдатам

Карэспандэнт: «А можа, проста расчараваліся ў гэтым інстытуце як такім?»

Збор подпісаў за Сяргея Калякіна
Збор подпісаў за Сяргея Калякіна

Чаму страшна? Таму што другі мэханізм — гэта вайна, рэвалюцыя, зьвяржэньне, бунт і ўсё астатняе. Гэта ні да чога добрага не прыводзіць ні для краіны, ні для людзей.

«Ну, так, яны проста ня бачаць, што выбары — інстытут зьмены ўлады. Тады гэта вельмі страшна. Чаму страшна? Таму што другі мэханізм — гэта вайна, рэвалюцыя, зьвяржэньне, бунт і ўсё астатняе. Гэта ні да чога добрага не прыводзіць ні для краіны, ні для людзей. Але трэцяга проста не бывае. Таму, калі ўлада ўсё зрабіла, каб людзі ня верылі ў выбары, яна штурхае людзей на тое, што людзі будуць вырашаць гэтыя праблемы па-іншаму. У гэтым віна ўлады — што сваёй палітыкай яна ня выгадавала грамадзян краіны. Многія вераць, што прыляціць нейкі Бэтмэн і вырашыць усе іх праблемы. А самім удзельнічаць, каб зьмяніць сытуацыю — яны ня хочуць».

Некаторыя сябры пікетаў за Калякіна носяць майкі салідарнасьці з палітвязьнем Міколам Статкевічам
Некаторыя сябры пікетаў за Калякіна носяць майкі салідарнасьці з палітвязьнем Міколам Статкевічам

Карэспандэнт: «А якія посьпехі ў вас у зборы подпісаў? Ці ўдасца сабраць патрэбныя 100 тысяч?»

«На заўчорашні дзень у нас было 30 тысяч подпісаў. Сярэдні дзённы збор выходзіць, значыць, 2065. А трэба, для таго каб сабраць, — 3500 за дзень. Хоць штодзённы рост нейкі і ёсьць, але зь цяжкасьцю ідзе кампанія. І шанцы такія, што калі не павялічым тэмпы, то не зьбяром. І невядома, хто больш ад гэтага прайграе: я як кандыдат — або тыя людзі, якія ў выніку прыйдуць на выбары і там пабачаць прозьвішча аднаго чалавека...»

Сяргей Калякін
Сяргей Калякін

Выказаўся Сяргей Калякін і наконт учарашняй заявы Аляксандра Лукашэнкі ў інтэрвію незалежнымі СМІ, што «Лінія Сталіна» — «бязглузьдзіца сталінскіх часоў»:

«Справа ў тым, што „Лінія Сталіна“ сапраўды не была задзейнічаная. Яна нават не была дабудаваная, а часткова — дэмантаваная. Яна ніякага значэньня ваеннага ня мела. Але нашто яе тады [уладам сучаснай Беларусі. — РС] было адбудоўваць — я так і не зразумеў. Да гэтага казалі, што „Лінія Сталіна“ — гэта сымбаль мужнасьці нашых людзей у часе абароны. А ўчора ён сказаў, што гэта проста ў насьмешку над тым, што рабіў Сталін, ён пасьмяяўся і пабудаваў гэта, пабудаваў там Сталіну помнік. Я вось гэтага не разумею, бо зусім нядаўна, калі адкрывалі „Лінію Сталіна“, ён казаў адваротнае. Але гэта даволі часта бывае ў Аляксандра Рыгоравіча, ён па адных і тых жа пытаньнях можа казаць узаемна процілеглыя рэчы».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG