Лінкі ўнівэрсальнага доступу

Выбарчыя камісіі — апазыцыі мінімум


Не пазьней за 22 ліпеня ў Беларусі павінны быць сфармаваныя тэрытарыяльныя выбарчыя камісіі.

Менавіта чальцы гэтых камісіяў будуць правяраць сапраўднасьць подпісаў, якія зьбіраюць за патэнцыйных кандыдатаў на прэзыдэнта іхныя ініцыятыўныя групы. Пакуль агульных дадзеных няма. А фрагмэнтарныя зьвесткі пераконваюць — як і на мінулых прэзыдэнцкіх выбарах, у склад тэрытарыяльных камісіяў увойдзе вельмі мала прадстаўнікоў апазыцыі. На тэрыторыі Беларусі ўтвараюцца 153 тэрытарыяльныя камісіі. 118 зь іх — гэта раённыя. Астатнія — абласныя і гарадзкія.

Спэцыфіку іхняй працы сакратар Цэнтравыбаркаму Мікалай Лазавік тлумачыць так:

«Калі ўчастковыя камісіі пераважна працуюць з выбарцамі, то тэрытарыяльныя — з кандыдатамі на прэзыдэнта. Яны на этапе вылучэньня кандыдатаў абавязаныя праверыць сапраўднасьць подпісаў за прэтэндэнтаў.

Паток ідзе так. Ініцыятыўная група зьбірае подпісы. У падпісным лісьце павінны быць подпісы выбарцаў, якія жывуць у адным раёне. І вось у гэтым раёне падпісныя лісты і здаюцца ў тэрытарыяльную камісію. Вось, напрыклад, сабралі ў Буда-Кашалёўскім раёне. Там ведаюць сваіх людзей. І могуць сказаць: чакайце, у нас такія людзі наагул ня значацца. І гэта забясьпечвае сапраўднасьць праверкі».

Дэмакратычныя партыі і грамадзкія арганізацыі вылучылі няшмат кандыдатаў у тэрытарыяльныя камісіі. Кіраўнік выбарчага штабу Аб’яднанай грамадзянскай партыі Леў Марголін тлумачыць гэта так:

«Мы плянуем сканцэнтравацца на ўчастковых камісіях. Дзесяць падач у тэрытарыяльныя камісіі рознага роўню было. Але пакуль толькі адзін чалавек — у Берасьцейскай вобласьці — трапіў у склад камісіяў».

Рух «За свабоду» наагул не накіроўваў у тэрытарыяльныя камісіі сваіх прадстаўнікоў, — кажа першы намесьнік старшыні руху Юрась Губарэвіч:

«Мы ня маем паводле закону такой магчымасьці, паколькі ў нас няма зарэгістраваных рэгіянальных структураў. Але мы рэкамэндавалі нашым людзям падаваць дакумэнты праз збор подпісаў. Думаю, некалькі чалавек такой магчымасьцю скарысталіся. Пакуль у нас няма дакладнай статыстыкі. Але, верагодна, нікога ў камісіі не ўключылі. Калі б такое адбылося, то нехта б паведаміў».

На папярэдніх выбарах ад апазыцыі актыўна паводзіла сябе партыя «Справядлівы сьвет». Яе лідэр Сяргей Калякін сёньня сказаў Свабодзе:

«Пакуль вядома толькі выбарачна. Яшчэ не паўсюль прайшлі паседжаньні. У Берасьці ўключылі ў абласную камісію, але не ўключылі ў гарадзкую. У Гарадзенскай вобласьці не ўключылі ў шэраг камісіяў. Агульнай карціны няма. Але сытуацыя падобная да той, як было раней. Істотных паляпшэньняў няма».

Фармаваньне тэрытарыяльных камісіяў скончыцца 22 ліпеня. А ўжо на наступны дзень зарэгістраваныя ініцыятыўныя групы могуць пачынаць збор подпісаў за сваіх кандыдатаў. Іх, як вядома, восем.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG